-2.91c
Երեվան
ուրբ, դկտ 27
Վարչապետ Նիկոլ Փաշինեան շնորհաւորական ուղերձ յղած է Միշել Պարնիէին՝ Ֆրանսայի Հանրապետութեան վարչապետի պաշտօնին նշանակուելու առիթով: Ուղերձին մէջ ըսուած է.
«Մեծարգոյ պարոն վարչապետ,
Ընդունէք խնդրեմ իմ ամենաջերմ շնորհաւորանքները Ֆրանսայի Հանրապետութեան վարչապետի պաշտօնում նշանակուելու կապակցութեամբ:
Վստահ եմ, որ Ձեր երկարամեայ մասնագիտական գործունէութեան եւ անցած քաղաքական ու դիւանագիտական կարեւոր ուղու ընթացքում ձեռք բերուած հարուստ փորձառութիւնն ու գիտելիքները լաւագոյնս կը ծառայեն բարեկամ Ֆրանսային եւ ֆրանսացի ժողովրդին։
Յանձնառու եմ համատեղ ջանքերով նպաստելու Հայաստան-Ֆրանսա բազմոլորտ ընդգրկուն օրակարգի ընդլայնմանն ու նոր յաւակնոտ ծրագրերի իրականացմանը, այդ թւում` տնտեսական համագործակցութեան ոլորտում:
Համոզուած եմ, որ մեր կառավարութիւնները կը շարունակեն սերտօրէն համագործակցել՝ ի նպաստ հայ եւ ֆրանսացի ժողովուրդների հազարամեայ ամուր բարեկամութեան խորացման եւ մեր երկու պետութիւնների միջեւ հաստատուած առանձնայատուկ յարաբերութիւնների զարգացման, որում անձամբ ունեցել էք մեծ ու խորհրդանշական դերակատարում: Դրա լաւագոյն օրինակներից է Հայաստանում Ֆրանսայի դիւանագիտական ներկայացուցչութեան պաշտօնական բացումը:
Բարձր եմ գնահատում Հայաստանին վերաբերող հարցերում Ձեր շարունակական ուշադրութիւնը։ Մեծ գնահատանքով ենք յիշում մեր երկրի համար դժուարին ժամանակներում Հայաստան կատարած Ձեր այցն ու հայ ժողովրդին ցուցաբերած համերաշխութիւնը։
Օգտուելով առիթից՝ ցանկանում եմ ընդգծել, որ մեծապէս կարեւորում ենք Ֆրանսայի հետեւողական ջանքերը տարածաշրջանում անվտանգութեան, արդար ու տեւական խաղաղութեան հաստատման գործում:
Մեծ սիրով առաջիկայում սպասում եմ Ձեր պաշտօնական այցին Հայաստան՝ ինչը գերազանց առիթ կը լինի Հայաստանի եւ Ֆրանսայի վերընթաց զարգացող համագործակցութեան ընդլայնման ու նոր ծրագրերի նախանշման շուրջ քննարկումների համար։
Վերստին շնորհաւորում եմ Ձեզ վարչապետի պաշտօնն ստանձնելու կապակցութեամբ՝ մաղթելով յաջողութիւն Ձեր բարձր առաքելութեան իրականացման գործում»։
