32.16c
Երեվան
կրկ, հնս 21
Վարչապետ Նիկոլ Փաշինեան ընդունած է Հաւաքական անվտանգութեան պայմանագրի կազմակերպութեան (ՀԱՊԿ) անդամ երկիրներու Անվտանգութեան խորհուրդներու քարտուղարներու կոմիտէի նիստի մասնակիցները:
Բացման խօսքին մէջ վարչապետ Փաշինեան նշած է.
«Մենք նշում ենք Հաւաքական անվտանգութեան պայմանագրի ստորագրման 30-ամեակը եւ Հաւաքական անվտանգութեան պայմանագրի կազմակերպութեան ստեղծման 20-ամեակը, եւ մեզ համար մեծ պատիւ է այս յոբելեանական տարում նախագահել մեր կազմակերպութիւնում: Դուք գիտէք, եւ մենք բազմիցս դա քննարկել ենք` ՀԱՊԿ արդիւնաւէտութեան բարձրացումը մեր նախագահութեան կարեւորագոյն առաջնահերթութիւններից է, եւ մենք կարծել ու կարծում ենք, որ պէտք է լաւարկել իրավիճակներին արագ եւ ճգնաժամային արձագանգման մեխանիզմները:
Ցանկանում եմ նշել, որ սկզբունքօրէն մենք նաեւ իրաւական դաշտ ունենք այդ առումով, եւ 2010 թուականի Դեկտեմբերի 10-ին Հաւաքական անվտանգութեան պայմանագրի կազմակերպութեան Հաւաքական անվտանգութեան խորհրդի որոշմամբ ընդունուել է դրոյթ` ճգնաժամային իրավիճակներին Հաւաքական անվտանգութեան պայմանագրի կազմակերպութեան արձագանքելու կարգի վերաբերեալ, եւ ես կարծում եմ, որ այս փաստաթուղթը բաւական հասկանալիօրէն ձեւակերպում է այն մեխանիզմները, որոնք գոյութիւն ունեն մեր կազմակերպութիւնում:
Ցանկանում եմ ձեր ուշադրութիւնը հրաւիրել այն բանի վրայ, որ այդ դրոյթում կայ նաեւ այսպիսի հասկացութիւն` «առաքելութիւն», որը ձեւակերպուած է հետեւեալ կերպ. անդամ պետութիւնների մասնագէտների խումբ` կազմուած ՀԱՊԿ անդամ պետութիւնների` այս դրոյթին համապատասխան նշանակուած ներկայացուցիչներից եւ ժամանակաւորապէս ճգնաժամային իրավիճակի գօտի ուղարկուող` իրավիճակի մշտադիտարկում իրականացնելու, իրադրութիւնը տեղում որոշելու եւ ճգնաժամային իրավիճակի կանխարգելման եւ կարգաւորման ուղղութեամբ կազմակերպութեան հետագայ միջոցառումների վերաբերեալ առաջարկներ մշակելու, ինչպէս նաեւ ՀԱՊԿ Հաւաքական անվտանգութեան խորհրդի կողմից սահմանուած այլ գործառոյթներ իրականացնելու նպատակով:
Ցանկանում եմ նաեւ ուշադրութիւն հրաւիրել, որ այս փաստաթղթի երկրորդ գլխում կայ «վերահսկողութիւն» կոչուող գլուխ, եւ ՀԱՊԿ քարտուղարութիւնը մշտական հիմունքով իրականացնում է կազմակերպութեան պատասխանատուութեան գօտում իրավիճակի եւ դրա զարգացման միտումների վերաբերեալ տեղեկատուութեան հաւաքում եւ վերլուծութիւն` ճգնաժամային իրավիճակների նախադրեալները վերհանելու նպատակով:
Ինչո՞ւ եմ ես այս մասին խօսում: Դուք գիտէք, որ դեռեւս նախորդ տարի Մայիս ամսին Ատրպէյճանի զինուած ուժերը ներխուժեցին մեր տարածք, եւ այդ կապակցութեամբ մենք դիմեցինք ՀԱՊԿ-ին: Ես բազմիցս այդ մասին խօսել եմ, եւ որպէս նախագահող` ցանկանում եմ ընդգծել, որ այդ հարցը պէտք է քննարկել, ինչպէս հարկն է: Ինչո՞ւ` որովհետեւ տեսնում ենք, որ Ատրպէյճանի կողմից յարձակողական յայտարարութիւնները շարունակւում են, եւ մենք այս հարցը պէտք է քննարկենք` յատկապէս հաշուի առնելով, որ Հայաստանը դիմել է ՀԱՊԿ-ին, քանի որ դա ե՛ւ մեզ, ե՛ւ կազմակերպութեան համար շատ սկզբունքային հարց է:
Մեր դիրքորոշումն այն է, որ Հայաստանի եւ Ատրպէյճանի միջեւ գոյութիւն ունի սահման, քանի որ 1991 թուականին, երբ ստեղծուել է Անկախ պետութիւնների համագործակցութիւնը, ստորագրուել է միջպետական համաձայնագիր, որում յստակ գրուած է, սահմանուած է, որ երկրները փոխադարձաբար ճանաչում են միմեանց միջեւ գոյութիւն ունեցող սահմանները: Այստեղ նկատի են առնւում Խորհրդային միութեան ժամանակաշրջանի վարչական սահմանները, եւ ես կարծում եմ, որ մենք պէտք է այս ելակէտն ունենանք: Այս իրավիճակի հակառակ մեկնաբանութիւնը, կարծում եմ, կը նուազեցնի ՀԱՊԿ արդիւնաւէտութիւնը»:
Վարչապետը ՀԱՊԿ անդամ երկիրներու ԱԽ քարտուղարներուն հետ քննարկած է կազմակերպութեան օրակարգին եւ գործունէութեանը վերաբերող հարցեր: Միտքեր փոխանակուած են տարածաշրջանային եւ միջազգային անվտանգութեան մարտահրաւէրներու շուրջ:
