5.09c
Երեվան
ուրբ, նմբ 22
Օրերս, Փարիզի Ս. Յովհաննէս-Մկրտիչ մայր տաճարին մէջ տեղի ունեցած է վերջին հրաժեշտի արարողութիւնը՝ վաստակաշատ երաժշտագէտ, յօրինող ու խմբավար Կարպիս Ափրիկեանի, որ իր մահկանացուն կնքած էր Հոկտեմբեր 15-ին, 98 տարեկանին։
Այս մասին «Արեւելք» տեղեկացաւ Փարիզի «Նոր Յառաջ» պարբերականէն։
Ստորեւ այդ մասին հրապարակուած լուրը՝
Շաբաթ, Հոկտեմբեր 26-ին, Փարիզի Ս. Յովհաննէս-Մկրտիչ մայր տաճարին մէջ տեղի ունեցաւ վերջին հրաժեշտի յուզիչ արարողութիւնը երաժշտագէտ, յօրինող, յիսուն տարի «Սիփան-Կոմիտաս» երգչախումբի խմբավարութիւնը ստանձնած, անունը այդ երգչախումբին հետ զօդուած մաէսթրօ Կարպիս Ափրիկեանի, որ իր մահկանացուն կնքած էր Հոկտեմբեր 15-ին, 98 տարեկանին։
Եկեղեցին ծայրէ-ծայր լեցուցած բազմութեան մաս կը կազմէին բացի հանգուցեալին հարազատներէն՝ Փարիզի փոխքաղաքապետ Առնօ Նկաչա, Հայաստանի դեսպան տիկին Յասմիկ Տոլմաջեան, Արցախի ներկայացուցիչ Յովհաննէս Գէորգեան, գեղարուեստական, քաղաքական եւ լրատուական աշխարհի բազմաթիւ անձնաւորութիւններ՝ հայ եւ ոչ հայ, ինչպէս նաեւ արժանաշատ խմբավար ու երաժիշտին իրենց յարգանքի վերջին տուրքը մատուցելու փութացած հայ համայնքի մեծ թիւով անդամներ: Յուղարկաւորութեան արարողութեան աւարտին արտասանուեցան դամբանականներ, որոնցմէ Կարպիս Ափրիկեանի որդիներէն Կորիւնի՝ իր «առիւծ» հօր յղած խօսքը յատկապէս սրտաշարժ էր։
