Մխիթարեան Միաբանութիւնը համալրուեցաւ երիտասարդ միաբանով. Հայր Կորիւն վրդ. Ճէնանեանի ձեռնադրութիւնը

 Մխիթարեան Միաբանութիւնը համալրուեցաւ երիտասարդ միաբանով. Հայր Կորիւն վրդ. Ճէնանեանի ձեռնադրութիւնը

 Սուրբ Ղազար վանքի հայաշունչ օրրանին մէջ օրերս  տեղի ունեցած է ձեռնադրութեան կարգ։ 

 Այսպէս եւ ըստ «Արեւելք»ի աղբիւրին բնիկ Պէյրութահայ Նարեկ սարկաւագ Ճէնանեան ձեռամբ Մխիթարեան Միաբանութեան մօտ քահանայապետական Պատուիրակ տ. Լեւոն արք. Զէքիեանին ստացած է քահանայական  կոչում վերակոչուելով Տ. Կորիւն վարդապետ։

 Մեր ընթերցողներուն կը ներկայացնենք այս առթիւ Միաբանութեան կողմէ տարածուած հաղորդագրութիւնը։

Ս.Աստուածածնի Ծննդեան տօնին, Չորեքշաբթի, 8 Սեպտեմբեր 2021ին, յոյժ ցնծալի օր մը եղաւ Մխիթարեան Միաբանութեան համար. Տէր Կորիւն Սրկ. Ճէնանեան քահանայական ձեռնադրութիւն ստացաւ ձեռամբ Քահանայապետական Պատուիրակ՝ Արհիապատիւ Տէր Լեւոն Արք. Զէքիեանի, Վենետիկի Սուրբ Ղազար մայրավանքին մէջ հանդիսաւոր Սուրբ Պատարագի ընթացքին։

Երգ, աղօթք, խունկ ու յուզում կը բարձրանային խորանէն մինչեւ երկինք։

Հ. Մեսրոպ Վրդ., Տէր Կորիւն սարկաւագը ներկայացուց Տ. Լեւոն Արքեպիսկոպոսին, զինք քահանայ ձեռնադրելու համար։ 

Հոգեպարար աղօթքներու եւ խնկաբոյր շարականներու ընկերակցութեամբ՝ ձեռնադրութեան արարողութիւնը ամբողջանալուն եւ սրբալոյս միւռոնի օծումը ստանալուն, Հ. Կորիւն աբեղան քահանայական ամբողջական զգեստաւորմամբ՝ իր անդրանիկ օրհնութիւնը եռիցս բաշխեց ներկայ ժողովուրդին։ 

Ողջոյնի պահուն, սարկաւագները Խորանին առջեւ նորօծ աբեղային միւռոնաբոյր ափերը համբուրեցին։

Յաւարտ Ս. Պատարագին, բոլոր հաւատացեալները շնորհաւորական մաղթանքներով, համբուրեցին նուիրեալի ձեռքերը։

Հաւատացեալներու հոծ բազմութիւն մը ժամանած էր Ս. Ղազար։ Առաջին գիծին ներկայ էին ձեռնադրեալին ծնողքը եւ եղբայրները, ինչպէս նաեւ միաբանութեան մտերիմ հոգեւորականներ, քաղաքական իշխանութիւններու ներկայացուցիչներ եւ բարեկամներ։

Կը մաղթենք որ նորօծ աբեղան՝ Հ. Կորիւնը, Մխիթար Աբբահօր հոգիով եւ գաղափարականով խանդավառ, ծառայէ երեքդարեան միաբանութեան յարկէն ներս, Ատուծոյ փառքին եւ Հայ ժողովուրդի հոգեւոր բարիքին, անսասան հաւատքով եւ հաստատուն մնայ իր սուրբ կարգին մէջ։