-2.91c
Երեվան
ուրբ, դկտ 27
Լոնտոնի եւ Նիւ Եորքի մէջ կեդրոններ ունեցող հեղինակաւոր «Պլումզպերի» հրատարակչատան I. B.Tauris բաժանմունքէն լոյս տեսաւ Պորիս Աճէմեանի The Brass Band of the King: Armenians in Ethiopia հատորը։
Այս մասին «Արեւելք» կը կարդայ ԱՄՆ հրապարակուող «Ասպարէզ»էն, որ մասնաւորապէս կը գրէ`
Գիրքը պատմութիւնն է Հայոց Ցեղասպանութենէն ճողոպրած այն քառասուն որբերուն եւ խմբավար Գէորգ Նալպանտեանի, զորս Եթովպիոյ Հայլէ Սելասիէ թագաւորը 1924ին Երուսաղէմէն բերաւ Եթովպիա՝ շեփորախումբ մը կազմել նպատակով։ Նալպանտեան աւելի ուշ պիտի դառնար նաեւ Եթովպիոյ քայլերգին հեղինակը:
Դոկտ. Պորիս Աճէմեան տնօրէնն է ՀԲԸՄի Ֆրանսայի «Նուպար» գրադարանին։ Ան մասնագիտութեամբ պատմաբան է եւ համախմբագիրն է արդի հայագիտութեան նուիրուած՝ Etudes Armeniennes Contemporaines պարբերաթերթին։
Հատորը մաս կը կազմէ փրոֆ. Պետրոս Տէր Մաթոսեանի խմբագրութեամբ հրատարակուող՝ Armenians in the Modern and Early Modern World շարքին։
Յաւելեալ տեղեկութիւններու կամ հատորէն օրինակ մը ապսպրելու համար այցելել կայքէջը, իսկ 35 տոկոսի զեղչ մը ստանալու համար գործածել GLR AT8 գաղտնաթիւը։
