14.09c
Երեվան
ուրբ, ապր 24
Արցախի ԱԺ արտահերթ նիստին պատգամաւոր Արթուր Մոսիյեանը հրապարակեց ԱՀ ԱԺ յայտարարութեան բնագիրը, որով անընդունելի կը համարեն Արցախի համար որեւէ այլ կարգավիճակ, քան ինքնորոշումն է:
Արցախի Աժ-ն յայտարարութիւնը միաձայն ընդունեց:
Յայտարարութեան մէջ, մասնաւորապէս, կը նշուի.
«Արցախի Հանրապետութեան ներկայիս իրաւաքաղաքական կարգավիճակը ձեւաւորուել է համաժողովրդական կամքի արտայայտութեամբ 3 հանրաքուեների, դրանց արդիւնքում ընդունուած Սահմանադրութեան ազդեցութեամբ եւ հայութեան բոլոր հատուածների միջեւ նախընթաց տարիներին հաստատուած համազգային համաձայնութեան ճանապարհով: Արցախահայութիւնը քաջ գիտակցում է խաղաղութեան գինը: Արցախի պետականութիւնը եւ պատմական հայրենիքում ազատ ու անկախ ապրելու իրաւունքը բացարձակ արժէքներ են, եւ դրանցից անգամ պատերազմի սպառնալիքը չի կարող մեզ հետ պահել: Հայաստան-ադրբեջան չակերտաւոր խաղաղութեան օրակարգով Արցախն Ատրպէյճանին բռնակցելու ցանկացած բանակցային գործընթաց ինքնին, ինչպէս նաեւ դրանից բխող փաստաթղթի ստորագրումը տապալում է ոչ միայն Արցախի պետականութիւնը, այլեւ արցախահայութեան իր պատմական հայրենիքում ապրելու անքակտելի իրաւունքը: Պահանջում ենք, որ Հայաստանի իշխանութիւնները հրաժարուեն իրենց ներկայիս աղէտալի դիրքորոշումից եւ առաջնորդուեն բացառապէս այդ արժէքներով: Ոչ մի իշխանութիւն իրաւունք չունի խաղաղութեան պատրուակով Արցախի համար անընդունելի կարգավիճակի, ինչպէս նաեւ միջազգայնօրէն ճանաչուած ինքնորոշման իրաւունքի բանակցային նշաձողն իջեցնելու: Արցախահայութեան անունից դիմում ենք աշխարհասփիւռ հայութեանը` այս արդար պայքարում միասնաբար եւ վճռականօրէն կանգնել Հայաստանի եւ Արցախի, մեր եղբայրների ու քոյրերի կողքին: ՀՀ ԱԺ մեր գործընկերներին` չշեղուել ՀՀ Գերագոյն Խորհրդի 1992 թուականի Յուլիսի 8-ի որոշման ուղեգծից: ՌԴ ղեկավարութեանը` մեզ համար խիստ կարեւոր խաղաղապահ առաքելութեան ընթացքում առիթ չտալ որեւէ մէկին` շահարկել ծագող խնդիրները, որպէս Արցախի ժողովրդի յետագայ անվտանգութիւնը հարցականի տակ դնելու հիմք: ԵԱԿՀ Մինսքի համանախագահ երկրներին` անկախ առկայ այլ տարաձայնութիւններից, ջանքեր գործադրել, պահպանելու ԼՂ-ի հիմնախնդրի կարգաւորման միակ միջազգային մանտաթ ունեցող ձեւաչափ», կը նշուի յայտարարութեան մէջ:
