3.09c
Երեվան
ուրբ, դկտ 12
ՀՀ վարչապետ Նիկոլ Փաշինեանի հետ հանդիպած Հայաստանեայց Առաքելական Սուրբ Եկեղեցւոյ խումբ մը եպիսկոպոսներ հանդէս եկած են յայտարարութեամբ, որուն մէջ, lurer.am-ի հաղորդմամբ, մասնաւորապէս ըսուած է․
«Ցաւով տեղեկացանք, որ առաջիկայ Եպիսկոպոսաց ժողովը չհիմնաւորուած պատճառաբանութեամբ յետաձգուել է Ամենայն Հայոց Գարեգին Բ. Կաթողիկոսի կողմից, որը հնարաւորութիւն պէտք է ստեղծէր բոլոր եպիսկոպոսներիս` բարձրագոյն ատեանում կանոնական մեր տեսակէտը արտայայտելու եւ փաստարկելու։ Ափսոսում ենք, որ մեր կողմից բարձրացուած լրջագոյն հարցերը այդպէս էլ մնացին անպատասխան։
Ինչ վերաբերում է Մայր Աթոռի կողմից եպիսկոպոսներիս ուղղուած անհիմն մեղադրանքներին, մէկ անգամ եւս ՎԵՐԱՀԱՍՏԱՏՈՒՄ ԵՆՔ մեր անմնացորդ ուխտը Սուրբ Էջմիածնի հանդէպ, հաւատարմութիւնը՝ Հայաստանեայց Առաքելական Սուրբ Եկեղեցու կարգին եւ կանոններին, աւանդութիւններին եւ մեր զինուորեալ միաբանութեանը։
Կոչ ենք անում հոգեւոր մեր եղբայրներին ՉՏՐՈՒԵԼ ՍԱԴՐԱՆՔՆԵՐԻ, զերծ մնալ վիրաւորական խօսոյթից եւ չթիրախաւորել եպիսկոպոսներիս նուիրական առաքելութիւնը՝ յարգանքով վերաբերուելով Եկեղեցու նուիրապետական կարգին:
Մէկ անգամ եւս ՎԵՐԱՀԱՍՏԱՏՈՒՄ ԵՆՔ մեր հիմնաւոր եւ արդարացի դիրքորոշումը, որ՝ ԱՆՀՐԱԺԵՇՏ Է հիմնարար լուծում տալ մեր պետութեան եւ Սուրբ Եկեղեցու շուրջ ծաւալող անընդունելի երեւոյթներին։
Հայցում ենք Ամենակալ Տիրոջ անսահման ողորմութիւնը եւ զօրակցութիւնը հայրենի մեր երկրին, Սուրբ Էջմիածնին եւ մեր բարեպաշտ ժողովրդին»։
Յիշեցնենք՝ օրեր առաջ եպիսկոպոսները յայտարարութիւն տարածած էին՝ դատապարտելով Գարեգին Բ.-ի վարքագիծը:
