32.09c
Երեվան
երք, օգս 18
Իշխանութիւնը կ՚ուզէ որոշել, թէ ով պէտք է ղեկավարէ եկեղեցին, սա կը նշանակէ, որ իրաւական երկիր չունինք: Այս մասին Ազգային Ժողովէն ներս ըսած է «Հայաստան» խմբակցութեան կողմէ Մարդու իրաւունքներու պաշտպանութեան մշտական յանձնաժողովի նախագահի թեկնածու առաջադրուած Լիլիթ Գալստեանը:
«Քաղաքական մեծամասնութիւնը յանցաւոր եւ բացայայտ հակասող սահմանադրական ընթացք է որդեգրել՝ յայտարարելով Վեհափառ Տիրոջը հրաժարական պարտադրելու եւ ինքնավար եկեղեցու կառավարման կարգը փոխելու իր նպատակադրումը։ Երբ իշխանութիւնն է ամէն գնով որոշում, թէ ով պէտք է ղեկավարի եկեղեցին, սա այլեւս խօսում է ամէն բանի մասին, բայց ոչ իրաւական պետութեան։ Դահլիճի ճնշող մեծամասնութիւնը քաջատեղեակ է այն ծանր քաղաքական գնահատականներին, որ հնչեցրել եմ Հայաստանում մարդու իրաւունքների համատեքստում:
Ցաւօք, գնահատականներս ոչ միայն չեն փոխուել, այլեւ երկրում տիրող ամենաթողութեան, անպատժելիութեան, խորացող ավտոկրատիայի համապատկերում վերածուել են երկրի սահմանադրական կարգին ուղղուած լրջագոյն սպառնալիքի: 2021-2025 թուականներին Հայաստանում մարդու իրաւունքների վիճակի վերաբերեալ բաւական մեծածաւալ ուսումնասիրութիւններ են կատարել միջազգային կազմակերպութիւններ, տարբեր գերատեսչութիւններ, ՄԻՊ-ի քաղաքական հասարակութեան ներկայացուցիչներ, ինչպէս նաեւ Եւրոպայի խորհրդի մարդու իրաւունքների յանձնակատարը։
Այս կառոյցները քննութեան առարկայ են դարձրել իրաւական եւ ժողովրդավարական պետութեան հիմքում ընկած կարեւորագոյն սկզբունքներ՝ կեանքի իրաւունք, խոշտանգումներ, անձնական ազատութիւն, կալանք, արդար դատաքննութիւն, հաւաքների ազատութիւն, ընտրական իրաւունք, սոցիալական, կրթական, առողջապահական իրաւունքներ եւ խոցելի խմբերի իրաւունքները։ Ուսումնասիրութիւնների համադրումը, ինչպէս մեր ամէն օրը, բացայայտում է, թէ որքան հեռու է Հայաստանը խոստացուած ժողովրդավարական արժէքներից եւ որքան խորն է իրականութիւնների խզումը»,- նշած է Գալստեանը:
