17.09c
Երեվան
չրք, սպտ 30
Քալիֆորնիոյ Քանոկա Փարքի մէջ գործող ՀԲԸՄ Մանուկեան-Տէմիրճեան վարժարանը պատմական օր մը ապրեցաւ՝ հանդիսաւոր կերպով բանալով եւ օրհնելով «Մանուկեան-Սիմոն» համագործակցային կեդրոնը (MSCC) եւ նորակառոյց մատուռը։
ՔԱՆՈԿԱ ՓԱՐՔ, Քալիֆորնիա.- Սեպտեմբեր 12ին, ՀԲԸՄի Մանուկեան-Տէմիրճեան վարժարանը նշեց իր պատմութեան վճռորոշ պահերէն մէկը՝ «Սինանեան» հրապարակին վրայ գտնուող «Մանուկեան-Սիմոն» համագործակցային կեդրոնին (MSCC) եւ մատուռի մը բացումով ու օրհնութեամբ: Այս իրադարձութիւնը պսակումն էր տարիներու տեսլականին, առատաձեռնութեան եւ համագործակցութեան:
Հարիւրաւոր հիւրեր համախմբուած էին դպրոցի շրջափակին մէջ՝ տօնախմբելու այս պատմական առիթը. անոնց շարքին էին նուիրատուներ, ներկայ եւ նախկին ուսուցիչներ ու պաշտօնեաներ, շրջանաւարտներ, աշակերտներ, ընտանիքներ, հիւրեր, համայնքային ղեկավարներ, համակիրներ եւ վարժարանի բազմամեայ բարեկամներ: Տօնակատարութիւնը կ՛արտացոլէր կեդրոնին իրականացման ետին կանգնած համայնքային արտակարգ ճիգը եւ կրթութեան ապագային մէջ ներդրում կատարելու հաւաքական հաւատքը:
Հանդիսութիւնը սկսաւ ՀԲԸՄի սկաուտներու դրօշակի արարողութեամբ, որուն յաջորդեցին Աշակերտական խորհուրդի նախագահ Պետիկ Օրունճաքճեալի եւ փոխնախագահ Շանթ Վաքեանի ողջոյնի խօսքերը:
Լոս Անճելըսի քաղաքապետական խորհուրդի անդամ Ատրին Նազարեան շնորհաւորեց դպրոցը եւ գնահատագիր մը յանձնեց: Նազարեան անդրադարձաւ նաեւ ծրագրի նախնական փուլերուն ունեցած իր մասնակցութեան եւ դպրոցի տեսլականին աջակցող նահանգային գումարներ ապահովելու ջանքերուն մէջ իր ունեցած դերին:
Տնօրէն Դաւիթ Ղուկասեան երախտագիտութիւն յայտնեց վարչութեան, ուսուցչական կազմին, պաշտօնէութեան, ծրագրի աշխատանքային խումբերուն եւ անհամար անհատներու, որոնք քուլիսներու ետին անխոնջ աշխատեցան՝ յաւակնոտ տեսլական մը իրականութիւն դարձնելու համար: Ան շեշտեց, որ բացումը սոսկ շէնքի մը աւարտը չէր, այլ նոր հնարաւորութիւններու ստեղծում՝ աշակերտներուն համար սորվելու, համագործակցելու եւ նորարարութիւններ ընելու համար:
Վարժարանի Հոգաբարձական խորհուրդի ատենապետ Գէորգ Զօրեան անդրադարձաւ տասնամեակներու այն առատաձեռնութեան, որ թոյլ տուած է դպրոցին շարունակաբար աճիլ ու զարգանալ: Ան գնահատեց յատկապէս ծրագրի գլխաւոր բարերար Քրիսթին Սիմոնը (Լուիզ Սիմոնի դուստրը եւ բարերարներ Ալեք եւ Մարի Մանուկեաններու թոռնուհին), որուն արտակարգ առատաձեռնութիւնն ու անսասան հաւատքը դպրոցին եւ ՀԲԸՄի հանդէպ կարելի դարձուցին այս կեդրոնի շինութիւնը:
Զօրեան նաեւ գնահատեց Տէմիրճեան, Օրունճաքճեալ եւ Սինանեան ընտանիքները, ինչպէս նաեւ Ճորճ Ֆիլիփս Կրտսերը եւ ՀԲԸՄ Կեդրոնական վարչութիւնը, որոնց անսասան առատաձեռնութիւնն ու տասնամեակներու աջակցութիւնը, բազմաթիւ այլ նուիրատուներու առատաձեռնութեան կողքին, անջնջելի դրոշմ ձգած են վարժարանին վրայ:
Ապա Շնորհք Ա․ քհնյ․ Տէմիրճեան աղօթքով եւ օրհնութեամբ առաջնորդեց ներկաները՝ հանդիսութիւնը խարսխելով այն հաւատքին, ժառանգութեան եւ արժէքներուն վրայ, որոնք առաջնորդած են դպրոցը իր ամբողջ պատմութեան ընթացքին՝ 1976ին՝ Ս. Պետրոս եկեղեցւոյ հողին վրայ հիմնադրումէն ի վեր: Արարողութիւնը եզրափակուեցաւ վարժարանին պարախումբի ելոյթով:
