13.09c
Երեվան
երք, հնս 24
Թրքական լրատուական աղբիւրներ կը հաղորդն, որ երկրի արտաքին գործոց նախարար Հաքան Ֆիտան այսօր Մոսկուա մեկնած է։
Ան Մոսկուա պիտի ժամանէ բանակցութիւններ վարելու Ռուսիոյ արտաքին գործոց նախարար Սերկէյ Լաւրովի հետ: Կը հաղորդուի, որ երէկ այս մասին յայտարարած է Ռուսիոյ արտաքին գործոց նախարարութեան բանբեր Մարիա Զախարովա:
Զախարովա մամլոյ ասուլիսի ընթացքին յայտնած է, որ Լաւրով եւ Ֆիտան Մոսկուայի մէջ կայանալիք բանակցութիւններուն ընթացքին պիտի քննարկեն բարձր մակարդակի հաղորդակցութիւններու ժամանակացոյցը: «Նախարարները պիտի քննարկեն նաեւ շրջանին, Ուքրանիոյ, Սուրիոյ, Լիպիոյ եւ Անդրկովկասի մէջ կացութիւնը եւ պիտի վերլուծեն ռուս-թրքական երկկողմանի համագործակցութեան վիճակը, ներառեալ ուժանիւթային ոլորտին մէջ ռազմավարական նախագիծերու իրականացումը», աւելցուցած է Զախարովա:
Ֆիտան Մոսկուա կ՛այցելէ 25 օգոստոսին Քիեւի մէջ Ուքրանիոյ նախագահ Վոլոտիմիր Զելենսքիի հետ հանդիպումէն եւ հացահատիկային գործարքը քննարկելէ ետք:
Ըստ ռուսական եւ թրքական աղբիւրներու, սեպտեմբերի սկիզբը կը սպասուի Թուրքիոյ նախագահ Ռեճեփ Թայիփ Էրտողանի այցելութիւնը Սոչի, ուր ան պիտի հանդիպի Ռուսիոյ նախագահ Վլատիմիր Փութինի հետ: Այցելութեան ստոյգ օրը տակաւին յայտնի չէ:
