24.09c
Երեվան
երք, օգս 26
6 օգոստոսին Համազգային Հայ կրթական եւ մշակութային միութեան Կեդրոնական վարչութեան նախաձեռնութեամբ, Հայաստանի Գիտութիւններու ազգային ակադեմիայի Պատմութեան հիմնարկի դահլիճին մէջ Համազգայինի Երեւանի գրասենեակը կազմակերպեց հայագէտ, պատմական գիտութիւններու դոկտոր Յակոբ Չոլաքեանին նուիրուած մեծարման ցերեկոյթ:
Ձեռնարկին նպատակն էր ներկայացնել ու արժեւորել Յակոբ Չոլաքեանի անգնահատելի վաստակը` հայագիտական, մանկավարժական, բանահաւաքչութեան, գրական ասպարէզներուն մէջ, կարեւոր համարել անխոնջ աշխատանքն ու ժառանգութիւնը, որ մեծ հարստութիւն է սերունդներուն համար:
Բարձր գնահատելով հայագէտի անցած ուղին` Համազգայինի Կեդրոնական վարչութիւնը որոշում տուած էր զայն պարգեւատրել Համազգայինի պատուոյ շքանշանով:
Չոլաքեանի կրթական եւ մանկավարժական գործունէութեան մէջ կարեւոր տեղ կը զբաղեցնեն նաեւ անոր հեղինակած դպրոցական դասագիրքերը, որոնք աւելի քան 3 տասնամեակ կիրարկուած են սփիւռքի հայկական նախակրթական, միջնակարգ եւ երկրորդական դպրոցներուն մէջ:
Ձեռնարկը սկսաւ Համազգայինի Երեւանի գրասենեակի տնօրէն Ռուզան Առաքելեանի ողջոյնի ու շնորհաւորութեան խօսքով:
Յակոբ Չոլաքեանի անցած ուղիին ու գործունէութեան անդրադարձան` ակադեմիկոս Աշոտ Մելքոնեան, Համազգային Կեդրոնական վարչութեան ատենապետ Զաքար Քէշիշեան, Կեդրոնական վարչութեան անդամ Կարօ Մանճիկեան, Լիբանանէն վաստակաշատ մանկավարժ Տիգրան Ճինպաշեան, Հնագիտութեան եւ ազգագրութեան հիմնարկի տնօրէն Արսէն Բոբոխեան, ՀՀ ԳԱԱ Հր. Աճառեանի անուան լեզուի հիմնարկի արեւմտահայերէնի բաժինի գիտաշխատող Անի Ֆիշէնքճեան: Յակոբ Չոլաքեանի աշակերտուհի Արաքս Մահտէսեան ներկայացուց երգ մը: Ձեռնարկին ընթացքին հնչեցին օրօրոցայինները:
Կարդացուեցաւ այս առիթով Ազգային Քարէն Եփփէ ճեմարանի Շրջանաւարտից միութեան Հայաստանի վարչութեան շնորհաւորական գիրը:
Համազգայինի Կեդրոնական վարչութեան ատենապետ Զաքար Քէշիշեան վարչութեան կողմէն Յակոբ Չոլաքեանին յանձնեց Համազգայինի պատուոյ շքանշանը:
Աւարտին իր սրտի խօսքը արտասանեց մեծարեալը` Յակոբ Չոլաքեան:
