6.09c
Երեվան
հնգ, դկտ 25
Արցախի մէջ իրավիճակը օրհասական է. մարդիկ հացի համար հերթեր կը կանգնին, փոխադրամիջոց ընդհանրապէս չաշխատիր, աղիքային հիւանդութիւններ արդէն կը տարածուին բնակչութեան մօտ: Այս մասին NEWS.am-ի հետ զրոյցին նշած է Արցախի Ազգային Ժողովի «Արդարութիւն» խմբակցութեան պատգամաւոր Մետաքսէ Յակոբեանը:
«Այսօր ոտքով եմ Ստեփանակերտի մի ծայրից գնացել միւս ծայր, տրանասպորտն ընդհանրապէս չի գործում: Մարդիկ դրսում փորձում են սնունդ հայթայթել, հերթեր են կանգնում հացի համար, կաթնամթերք անհնար է գնել, կարող է բնակչութեան մէկ կամ երկու տոկոսն է կարողանում օգտուել, տաւարի, խոզի, գառի միս այլեւս չկայ, չգիտեմ՝ ինչքանով կան պաշարներ, բայց չեն կարողանում գիւղից տեղափոխել: Բանջարեղէնի գները շատ թանկ են, լոլիկը՝ 2000-2500 դրամ, սոխը՝ 1000-1700 դրամ ու նման գներ են մնացած բանջարեղէնի դէպքում, որ բնակչութեան մեծամասնութիւնը չի կարող գնել: Այս պահին Արցախում աղիքային վարակի խնդիր կայ, հիւանդանոցները լիքն են, բայց մինիմալ բուժօգնութիւն են ցոյց տալիս: Գիւղերից են դժուարանում բերել քաղաք, խնդրում են ռուս խաղաղապահներին, որ ծանր դէպքերը ուղղաթիռով բերեն, բայց էլի մեծ օգնութիւն չեն կարողանում ցոյց տալ»,-ըսած է ան:
Յակոբեանի խօսքով՝ այս ամէնէն զատ ծանր հոգեբանական վիճակ կը տիրէ քաղաքացիներու մօտ:
«Բոլորը հասկանում են, որ մենք այսօր բացի Ադրբեջան կոչուած թշնամուց,մենք այսօր ունենք թշնամի, որոնք Երեւանի կեդրոնում են նստած, մարդիկ դա այդպէս էլ ընդունում են, որովհետեւ ՀՀ իշխանութիւնները հաւասար թշնամի են, դրան զուգահեռ Արցախի իշխանութիւնը, որովհետեւ նախագահի պահուածքը մէկ շաբաթ շարունակ մեծ բարկութիւն է առաջացրել, լաւագոյն դէպքում ծաղրում են նախագահի յայտարարութիւնը: Այսինքն ինչ կտրուկ քայլերի մասին է խօսքը, ուղղակի մէկ շաբաթ մարդկանց սպասեցնելով մեր երկրի սուբյեկտայնութիւնն է իջեցնում, երեւի թէ Նիկոլի պահանջով»,-ըսած է ան:
Պատգամաւորի խօսքով՝ Արցախի նախագահը յստակ գործողութիւններ կատարելով այս պահուն կը յանձնէ Արցախը:
«Մեր պետութեան պատառիկները, որը մենք մեր կեանքի, մեր առողջութեան գնով պահել ենք, նախագահը հիմա ՀՀ իշխանութիւնների հրահանգով վերացնում է, որ երեւի աւելի հեշտ ինտեգրուենք Ադրբեջանին: Իրականում բարկութեան ալիքը ներսում է, բայց սա չի կարող մնալ, մարդիկ դեռ սպասում են՝ վաղը ինչ կ'ասի եւ դա պոռթկալու է: Այսօր եւ ՀՀ եւ Արցախի իշխանութիւններին որպէս սուբյեկտ չեն դիտարկում»,-ըսած է ան:
Մետաքսէ Յակոբեանի խօսքով՝ ստեղծուած իրավիճակէն ելքը միակն է՝ հեռացնել իշխանութիւնները ե΄ւ Հայաստանի մէջ, ե΄ւ Արցախի մէջ:
«Ես արդէն չեմ հաւատում, որ սա թուլութեան կամ չհասկանալու արդիւնքում է տեղի ունենում: Հիմա ամենակարեւորը մեր սուբյեկտայնութեան պահելն ու բարձրացնելն է, որը մենք առաջարկում ենք, այսինքն պետութիւնը իր բնականոն կեանքով պէտք է ապրի, սակայն որն այսօր խաթարուած է: Մեր ներքին կեանքն այսօր չի կառավարւում, իսկ մենք ձեռքներս ծալած սպասում ենք հրաշքի, սակայն հրաշք չի լինելու»,-ըսած է ան:
Պատգամաւորը նշած է, որ Արցախի հարցը նման կերպ փակելէ ետք, յաջորդը Հայաստանը պիտի ըլլայ, քանի որ Պրիւքսէլի մէջ քննարկուած է Զանգեզուրի միջանցքի, գիւղերու յանձնման եւ ատրպէյճանցիներու վերադարձման հարցերը, որ տարօրինակօրէն չի քննարկուիր:
Յիշեցնենք, որ Արցախը շրջափակուած է 225 օր:
