Արցախի գրաւուած շրջաններուն մասին կարեւոր դիտարկում

Արցախի գրաւուած շրջաններուն մասին կարեւոր դիտարկում

Արցախեան պատերազմի աւարտէն մէկ տարի անցած է, սակայն Պաքուն չէ կրցած լրջօրէն զարգացնել Ատրպէյճանին անցած շրջանները։ Այս մասին ըսած է ռուս ռազմական փորձագէտ Փավել Ֆելկընկաուըրը։

«Ինչ-որ բան անոնք կ'ընեն, սակայն բնակչութիւնը չէ վերադարձած այնտեղ, պայթուցիկ սարքերու առկայութեան խնդիրը կը մնայ։ Սա ակնյայտօրէն կը դառնայ շատ լուրջ քաղաքական խնդիր Ալիեւի համար։ Ըստ երեւոյթին, կ'ենթադրուի, որ հայերը ինչ-որ տեղ քարտէզներ ունին, որոնք չեն ուզեր տալ։ Բայց ես վստահ չեմ, որ նման մանրակրկիտ քարտէզներ կան: Այս տարածքներուն մէջ կրնային մնալ վայրի ականապատ դաշտեր, որոնց երկար տարիներ ոչ ոք չէ սպասարկած։

Պաքուն, ըստ ամենայնի, չի յաջողիր ամբողջութեամբ ականազերծել այդ տարածքները, եւ սա արդէն քաղաքականապէս կարեւոր պահ է։ Քանի դեռ Ատրպէյճանը չէ տիրապետած անոնց, չի կրնար լրջօրէն զբաղիլ Արցախի խնդիրով։ Նախ պէտք է համալրել մնացած շրջանները, ինչը այնքան ալ լաւ չի կատարեր Պաքուն։ Պաքուն կը հրաժարի Արցախը ճանչնալէ եւ կը կարծէ, որ այնտեղ ապրող հայ բնակչութիւնը պէտք է ընդունի Ատրպէյճանի քաղաքացիութիւն կամ լքէ այդ տարածքները։ Նոյնիսկ ներկայիս տեսքով Արցախը կը հերքէ այդ։ Եւ քանի դեռ այդպէս է, անորոշ իրավիճակը պիտի պահպանուի եւս քանի մը տարի, եւ անոր փոփոխութիւնը կախուած պիտի ըլլայ տարածաշրջանի սահմաններէն դուրս գտնուող հանգամանքներէն», ըսաւ ան: