29.09c
Երեվան
կրկ, հնս 29
Վաղը ես Արցախի Հանրապետութեան ժողովուրդին ու Ազգային ժողովին պիտի ներկայացնեմ Արցախի Հանրապետութեան նախագահի պաշտօնէն հրաժարականի դիմումս: Այս մասին յայտարարութիւն տարածած է Արցախի նախագահ Արայիկ Յարութիւնեան:
Ստորեւ մեր ընթերցողներուն կը ներկայացնենք Արայիկ Յարութիւնեանի այդ առթիւ կատարած գրառման կարեւոր մասերը:
«Արցախի ժողովրդի կողմից Արցախի Հանրապետութեան նախագահ ընտրուելու արդիւնքում 2020թ. մայիսի 21-ին ստանձնել եմ Նախագահի լիազօրութիւնները: Յաջորդ իսկ օրուանից անցել եմ Արցախի պաշտպանունակութիւնն ամրապնդելու, Արցախի սահմանների անառիկութիւնն ապահովելու գործին: Ցաւօք, ընդամէնը չորս ամիս անց Ադրբեջանի կողմից սանձազերծուեց 44-օրեայ պատերազմը, որն աւարտուեց մեր պարտութեամբ: Ի հարկէ, կարելի է պարտութեան ողջ մեղաւորութիւնը բարդել Արցախի չորսամսեայ նախագահի վրայ, եւ ես ամենեւին չեմ հրաժարւում պատասխանատուութիւնից, բայց, հաւատացէք, մեզանից իւրաքանչիւրն ունէր պատասխանատուութեան իր բաժինը՝ ամէն մէկն իր կարգավիճակի ու կարողութիւնների չափով: Բոլոր դէպքերում, ես մի քանի անգամ յայտարարել եմ, հիմա հրապարակայնօրէն կրկին ներողութիւն եմ հայցում հայ ժողովրդից՝ մեղաւորութեան իմ բաժնի համար, բայց եւ նորից հաւաստիացնում եմ, որ 2020թ. 44-օրեայ պատերազմի ընթացքում ես ձեռնարկել եմ բոլոր քայլերն իմ ուժերի ու փաստացի լիազօրութիւնների սահմաններում, գուցէ եւ աւելին:
Արդէն գրեթէ ինն ամիս է՝ Արցախը գտնւում է ադրբեջանական շրջափակման մէջ, իսկ Արցախի պատանդառուած ժողովուրդը ենթարկւում է անթաքոյց ցեղասպանութեան: Այս ընթացքում մենք մեր կարողութիւնների սահմաններում ձեռնարկել ենք բոլոր հնարաւոր միջոցները ստեղծուած իրավիճակը աշխարհին ներկայացնելու եւ միջազգային հանրութեան աջակցութիւնը ստանալու համար, երկու անգամ հարցը քննարկման առարկայ էր դարձել նոյնիսկ ՄԱԿ-ի Անվտանգութեան խորհրդում, երկուական անգամներ ՄԱԿ-ի Արդարադատութեան միջազգային դատարանը եւ Մարդու իրաւունքների եւրոպական դատարանը կայացրել են Արցախն ապաշրջափակելու վերաբերեալ որոշումներ, բազմաթիւ յայտարարութիւններ ու կոչեր են հնչել հարիւրաւոր միջազգային սուբյեկտների (կառոյցներ) կողմից: Սակայն ադրբեջանական ագրեսիվ (յարձկողական) վարքագիծը որեւէ կերպ չի կանխուել:
Այսօր աշխարհում ձեւաւորուած աշխարհաքաղաքական անկայուն վիճակը, տարածաշրջանային իրադարձութիւններն ու կանխատեսուող զարգացումները, Արցախում եւ դրա շուրջ տեղի ունեցող երեւոյթները, արցախեան ներքաղաքական ու ներհասարակական մթնոլորտն ուղղակիօրէն յուշում են, որ առկայ է մօտեցումների ու քայլերի փոփոխութեան, ճկունութիւն դրսեւորելու անհրաժեշտութիւն: Նշուածին հասնելու համար Արցախում անհրաժեշտ է հիմնական դերակատարների փոփոխութիւն՝ սկսած ինձնից:
Նախքան այդ, այսօրուայ իմ հրամանագրով Արցախի Հանրապետութեան պետական նախարար Գուրգէն Ներսիսեանը ազատուել է զբաղեցրած պաշտօնից եւ պետական նախարար է նշանակուել Անվտանգութեան խորհրդի քարտուղար Սամուէլ Սերգէյի Շահրամանեանը, ում տրուել են լայն լիազօրութիւններ: Սամուէլ Շահրամանեանի ընտրութիւնը կատարելիս հաշուի եմ առել նրա սկզբունքայնութիւնը, ճկունութիւնը, տարբեր պատասխանատու դիրքերում նրա աշխատանքային փորձը եւ կուտակած գիտելիքները, որոնք անմիջականօրէն առնչւում են թէ՛ ազգային անվտանգութեանը եւ թէ՛ պետական կառավարմանը:
Սիրելի՛ հայրենակիցներ, ես շարունակելու եմ ընտանիքիս՝ Արցախում գտնուող անդամների հետ ապրել Արցախում, առաւելապէս ընդգրկուելու եմ Արցախի անվտանգութեան ապահովման գործում, շարունակելու եմ կրել իմ բաժին պատասխանատուութիւնը Արցախի ապագայի նկատմամբ եւ աջակցելու եմ երկրի գործող իշխանութիւններին: Իմ այս քայլն ուղղուած է նաեւ Արցախում ներքին կայունութիւնն ու հասարակական ամուր կարգն ապահովելուն: Ի հեճուկս բոլոր դժուարութիւնների, մեր ներքին կայունութիւնն ու հանրային համերաշխութիւնը բոլոր յաջողութիւնների նախապայմանն է, որից ցանկացած շեղում կամ շեղման փորձ պէտք է բացառուի:
Խաղաղութիւն, բարօրութիւն ու յաւերժականութիւն Արցախ աշխարհին ու հայ ազգին:»
