image
Հրատապ լուրեր:

Արցախցի պատանիներ իրենց ուսումը պիտի ստանան AMAA-ի «Աւետիսեան վարժարան»ին մէջ

 Արցախցի  պատանիներ իրենց ուսումը պիտի ստանան    AMAA-ի  «Աւետիսեան  վարժարան»ին մէջ

ԱՀԱԸ-ի  բարձր հովանաւորութեամբ   գործող «Աւետիսեան  վարժարան»ը   Արցախի վերջին դէպքերէն ետք իր  դռները բացած է  տեղահանուած  պատանիներու։

 Այս մասին «Արեւելք» կը տեղեկանայ ԱՀԱԸ-ի  կողմէ  տարածուած հաղորդագրութեամբ, ուր մասնաւորապէս գրուած է՝ 

 

2023-2024 ուսումնական տարուան AMAA-ի Աւետիսեան դպրոցին մէջ  ուսում ստացող  800 աշակերտէն 40-ը սեպտեմբեր 17-էն սկսեալ՝ բռնի տեղահանուած են Արցախի Ստեփանակերտ, Մարտունի քաղաքներէն, ինչպէս նաեւ Ճարտար, Հաթերք եւ Խնուշինակ գիւղերէն։ 

1-12-րդ դասարաններու ուսանող արցախցի աշակերտներու համար կը ստեղծուին բոլոր պայմանները՝ կրթօճախի նոր միջավայրի մէջ համարկուելու եւ բարձրորակ ուսում ստանալու համար։ Անոնց հետ կ՚աշխատի դպրոցի հոգեբանը։ Կրթօճախը տեղահանուած աշակերտներուն օժանդակած է գրենական պիտոյքներու եւ դասագիրքերու ձեռքբերման հարցերով: Եւս 4 արցախցի երեխայ ընդգրկուած է Աւետիսեան կրթահամալիրի մանկապարտէզին մէջ:

Ամերիկայի Հայ Աւետարանչական ընկերակցութեան (AMAA) Խորէն եւ Շուշանիկ Աւետիսեան դպրոց եւ համայնքային կեդրոնը կրթական հաստատութիւն է, որ կը տրամադրէ 12-ամեայ բարձրորակ, համակողմանի եւ անվճար կրթութիւն։

Դպրոցի շէնքի ժամանակակից ճարտարապետութիւնը կը դիւրացնէ եւ կը բարելաւէ ուսումնական գործընթացը։ Կրթահամալիրն արժանացած է «LEED Արծաթ» հաւաստագրի՝ որպէս բնապահպանական պահանջներուն համապատասխանող նախագիծ եւ տարածաշրջանին մէջ նման եզակի կառոյցներէն մէկը։

Նորագոյն արհեստագիտութիւններով յագեցած այս դպրոցը կ՚աջակցի Երեւանի Հարաւ-արեւմտեան թաղամասի՝ գլխաւորապէս ցած եկամուտ ունեցող համայնքին։

AMAA-ի առաքելութիւնը հասարակութեան խոցելի խումբերուն անհրաժեշտ գործիքակազմով զինելն է՝ դառնալու բազմակողմանի զարգացած քաղաքացիներ եւ իրացնելու սեփական ներուժը։

Վերջին չորս տարիներու ընթացքին կրթահամալիրի աւագ դպրոցն ունեցած է 111 շրջանաւարտ, որոնց 100%-ը կրթութիւնը շարունակած է երկրի առաջատար համալսարաններուն մէջ։

Արցախէն տեղահանուած աշակերտներու հոսքը Աւետիսեան դպրոց կը շարունակուի։

 

Ամերիկայի Հայ Աւետարանչական ընկերակցութիւն