30.62c
Երեվան
երկ, հնս 22
Սպանիոյ վարչապետ Փետրօ Սանչեսի կինը՝ Պեկոնիա Կոմեսը, պիտի կանգնի դատարանի առջեւ՝ կաշառակերութեան գործով։ Սպանացի դատաւորը որոշած է, որ Կոմես պէտք է յանձնէ իր անձնագիրը եւ չլքէ երկիրը։ Ան նաեւ պարտաւոր է ամիսը երկու անգամ ներկայանալ դատարան։ Այս մասին կը հաղորդէ CNN-ը։
Կոմեսի դէմ աւելի վաղ մեղադրանքներ առաջադրուած էին իւրացման, ազդեցութեան չարաշահման, գործարար համաձայնութիւններու մէջ կաշառակերութեան եւ միջոցներու ոչ նպատակային օգտագործման համար։ Քննութեան համաձայն՝ ան իբր օգտագործած է վարչապետի կնոջ իր կարգավիճակը՝ Մատրիտի համալսարանին մէջ իր մասնագիտական առաջընթացը խթանելու նպատակով։
Պեկոնիա Կոմեսն ու Փետրօ Սանչեսը կը հերքեն իրենց հասցէագրուած բոլոր մեղադրանքները։ Սանչես կը պնդէ, որ գործը քաղաքական շարժառիթներ ունի եւ զայն կոչած է «անպարկեշտ ծաղրերգութիւն»։
Քննութիւնը սկսած էր 2024-ին, երբ «Manos Limpias» («Մաքուր Ձեռքեր») հակակաշառակերական խումբը, որ կապեր ունի ծայրայեղ աջ շրջանակներու հետ, բողոք ներկայացուցած էր Կոմեսի դէմ՝ զինք մեղադրելով ազդեցութեան չարաշահման մէջ։
Սպանիոյ արդարադատութեան նախարար Ֆելիքս Պոլանիոսը դատաւորի որոշումէն ետք յայտարարած է, որ «ճշմարտութիւնը ի վերջոյ պիտի յաղթանակէ»։ Միեւնոյն ատեն, սպանական El País օրաթերթը քննադատած է գործի ընթացքը՝ զայն նկատելով չափազանցուած եւ մեծ չափով լրատուամիջոցներու ուշադրութիւնը գրաւելու միտուած։
