2.09c
Երեվան
երք, փտր 10
Ես պիտի ընեմ այնպէս, որ բոլոր ունակ մարդիկ, կամք, սկզբունքներ ունեցող, աշխատելու ցանկութիւն ունեցող գործիչներն ունենան իրենց կարեւոր տեղն այն խումբին մէջ, որ ընտրութիւններու պիտի երթայ «Առաջարկ Հայաստանին» ծրագիրով, գրած է Գագիկ Ծառուկեանը։
«Ամիսներ առաջ յայտարարել եմ «Առաջարկ Հայաստանին» ծրագրի մեկնարկը, համոզուած լինելով, որ պետութիւնները կորուստներից յետոյ վերականգնւում են ծրագրերի, գաղափարների, կամքի եւ երկրին նուիրուած, ունակ մարդկանց համախմբման շնորհիւ։
Սա վերկուսակցական նախաձեռնութիւն է, մեր քաղաքացիների մասին եւ նրանց մասնակցութեամբ կազմուող ծրագիր։ Այստեղ պիտի համախմբուեն մեր քաղաքացիների, ոլորտային լաւագոյն մասնագէտների, գործիչների, հանրային դէմքերի, սրտացաւ ու կարող մարդկանց գաղափարները՝ երկիրն այս վիճակից դուրս բերելու եւ յետպատերազմեան վերականգնման գնալու միասնական նպատակով։
Ձեւաչափի մասին
«Առաջարկ Հայաստանին» գաղափարը Նոյեան տապանի պէս մի բան է։ Միայնակ փրկուել հնարաւոր չէ։ Ոչ մի անհատ, ոչ մի կուսակցութիւն, ոչ մի դաշինք միայնակ չի կարող մեծ արդիւնքի հասնել։ Մեր խնդիրներն այնքան խորն են, վիճակը՝ այնքան բարդ, որ այլ մօտեցում է պէտք։ Եթէ ուզում ենք դուրս գալ այս վիճակից, գնալ յետպատերազմեան վերականգնման, վերականգնել մեր ազգային արժանապատւութիւնը, բոլոր ոլորտներում ապահովել աճ, ունենալ բարեկեցիկ, բարգաւաճ Հայաստան, ոտքի կանգնող հայկական աշխարհ, ապա պէտք է ստեղծենք պետական, գիտական, մասնագիտական մտքի «նոյեան տապան», որտեղ կուսակցական պատկանելութիւնը ոչ մի նշանակութիւն չունի, որտեղ յարգի են գիտելիքը, սկզբունքները, մարդկային որակները եւ պատրաստակամութիւնը՝ թէկուզ անձնապէս տուժել, բայց օգնել երկրին։
Ես մտադիր եմ իսկապէս քաղաքական, հանրային Նոյեան տապան ստեղծել, որտեղ կը հաւաքուեն բոլոր հետաքրքիր առաջարկները, գաղափարները, լուծումները, որտեղ ամէն մարդ կը գտնի իր անելիքը, իր տեղը, երկրին օգուտ տալու իր ձեւը։
Ինչպէս Նոյը տեսաւ փրկութեան եւ վերածննդի ճանապարհը, նոյնը մենք պիտի փորձենք անել այսօր։
Ես անելու եմ այնպէս, որ բոլոր ունակ մարդիկ, կամք, սկզբունքներ ունեցող, աշխատելու ցանկութիւն ունեցող գործիչներն ունենան իրենց կարեւոր տեղն այն թիմում, որն ընտրութիւնների կը գնայ «Առաջարկ Հայաստանին» ծրագրով։
Խնդիրները շատ են, ծանր են, բայց մենք դրանց պիտի նայենք որպէս փորձութիւն, որը մեզ այս կեանքում տրուել է յաղթահարման համար։ Եթէ պիտի վախենանք մեր սեփական երկրի խնդիրները լուծելուց, ապա ո՞ւմ ենք դրանք թողնում։ Մենք կարող ենք եւ պարտաւոր ենք դրանք լուծել։ Ուժերի համախմբումը, իրար լսելու ունակութիւնը, ներքին համերաշխութիւնը, կարող-ունակ մարդուն գնահատելու մեր վճռականութիւնը կը բերեն լուրջ արդիւնքների։ Ես ձեւաչափը պատկերացնում եմ այդպէս. անկախ իրաւական լուծումից՝ այն պէտք է լինի կարող անհատների «Նոյեան Տապան», որը սկիզբ կը դնի նոր կեանքի, նոր յաջողութիւնների։
Նախընտրական ցուցակի մասին․
Այսքան ժամանակ որեւէ մէկն ինձ չի դիմել ցուցակում այս կամ այն տեղը զբաղեցնելու համար։ Ինձ համար սա շատ կարեւոր է։ Ես իմ մէջ ունէի որոշում, որ ով էլ դիմէր նման հարցով՝ անկախ իր արժէքից, իր գիտելիքներից, ասելու էի՝ ցտեսութիւն, քեզ համար տեղ չկայ։ Հիմա մանդատակռուի ժամանակը չէ։
Ես ուզում եմ ամենակարեւոր սկզբունքն արձանագրենք.
պաշտօ´նը չի կարեւոր, երկի´րն է կարեւոր, մանդա´տը չի կարեւոր, աշխատանքի արդի´ւնքն է կարեւոր։
Եւ հիմա յայտարարում եմ.
Պատրաստ եմ ստեղծելու հնարաւորութիւններ՝ գիտելիք, սկզբունքներ, կամք, ունակութիւն, աշխատասիրութիւն ունեցող անհատների եւ միաւորների համար։
Այս յայտարարութիւնն օրեր առաջ պաշտօնապէս արել եմ երիտասարդութեան հետ հանդիպման ժամանակ։ Ասել եմ՝ ձերն է ապագան, դուք էք երկրի տէրը՝ ձեր փայլուն առաջարկներով, ձեր խանդավառութեամբ, ձեր՝ երբեք չկոտրուելու վճռականութեամբ. եկէ´ք, կպէք գործին։
Նոյնն այսօր ասում եմ լայն շրջանակներին։ Եթէ ունէք ցանկութիւն, պատրաստակամութիւն՝ դժուար աշխատանքի, ընդունում էք «Առաջարկ Հայաստանին» ծրագրի գաղափարները, պատրաստ էք ձեր առաջարկներով եւ ներկայութեամբ ուժեղացնելու այդ ծրագիրը, ապա ես պատրաստ եմ համատեղ աշխատանքի»։
