19.09c
Երեվան
երք, ապր 22
Պէյրութի «Ազդակ» օրաթերթէն կը կարդանք՝
ՀՅԴ Լիբանանի Կեդրոնական կոմիտէի եւ Հայկական երեսփոխանական պլոքի ներկայացուցիչ Յակոբ Բագրատունի երէկ «Շաղզոյեան» կեդրոնին մէջ ընդունեց «Հարաքեթ Արտ» շարժումի նախագահ Թալալ Տուէյհին:
Հանդիպումին ընթացքին Տուէյհի ներկայացուց շարժման աշխատանքներն ու ժողովրդագրական փոփոխութեան ընդդիմացող անոր կեցուածքները` ընդգծելով լիբանանցիներուն վրայ այդ փոփոխութեան ունենալիք հսկայական վտանգները:
Տուէյհի լուսարձակի տակ առաւ լիբանանեան կարգ մը շրջաններու, ինչպէս նաեւ Պուրճ Համուտի մէջ, մեծ թիւով սուրիացի տեղահանուածներու գոյութիւնն ու անոր վտանգները:
Տուէյհի շեշտը դրաւ տեղահանուածներուն ունեցած տնտեսական գործելաոճին վրայ` ընդգծելով, որ լիբանանեան տնտեսական եւ ընկերային իրականութեան վրայ այդ գործելաոճին իսկական ազդեցութիւնը արդէն իսկ շօշափելի է:
Տուէյհի ընդգծեց, որ արձանագրուած ապահովական միջադէպերուն եւ լարուածութեան հիմնական պատճառը սուրիացի տեղահանուածներուն տարածուիլն է եւ անոր սպառնացած վտանգները:
Հանդիպումին աւարտին Յ. Բագրատունի եւ Տուէյհի համաձայնեցան գործակցութիւնը շարունակել` ապահովելու համար հանրութեան շահերը:
