Արեվելք - Արևելք լրատուական

263
06/11/2019

«Բանաստեղծութիւնը եկաւ ամբողջացնելու Հայաստանի հանդէպ կարօտը» Երեւանի մէջ ներկայացուցեցաւ բանաստեղծ Տիգրան Գաբոյեանի նորատիպը

Ժամանակակից գրող Տիգրան Գաբոյեանը 4 հոկտեմբերին Հայաստանի գրողներու միութեան անդամներուն ներկայացուց երրորդ՝ «Ճեղքերս քաղաքակրթութիւններու պատերով» բանաստեղծական ժողովածուն:

«Տիգրանի բանաստեղծութիւններուն ծանօթ էի մամուլէն: Ամփոփ գիրքի մը մէջ անոր նկարագիրը աւելի յստակ կը դառնայ: Հեղինակի բանաստեղծական մտածողութիւնը գիտէի, բայց ան ինձ երբեմն յանկարծակիի կը բերէր: Անոր լեզուամտածողութիւնը, պատկերային, բանաստեղծական մտածողութիւնը շատ հետաքրքիր կ'արտայայտուին այս գիրքին մէջ: Այստեղ արտացոլուած են վերջին տարիներուն Սուրիոյ մէջ տեղի ունեցած դաժան իրողութիւնները, որոնց ականատեսը եղած է գրողը, եւ անոր կենսափորձը դարձած է բանաստեղծութիւն»,-«Արմէնբրես»-ի հաղորդմամբ` ըսած է միութեան նախագահ Էտուարտ Միլիտոնեանը:

Ան շեշտած է, որ Տիգրանն իր բանաստեղծական խօսքը կը մօտեցնէ մարդու հոգիին, եւ անոր մէջ կայ սէր, մարդկութիւն:

Տիգրան Գաբոյեանն ալ նշած է, որ իրեն շատերը քաջալերած են հրատարակել ժողովածուն: Ինք արդիւնքէն գոհ է:

Տիգրանն ինքն իրեն խոր հայաստանցի եւ ծանրակշիռ սփիւռքահայ անուանեց: «Որպէս քաղաքակրթական արժէք, սփիւռքը զիս տառապեցուցած է: Հայաստանն ու հայաստանակեդրոնութիւնը իմ կեանքիս մէջ միշտ առկայ էին: Առաջին բանաստեղծութիւնս նուիրուած էր Մասիսին: Կը կարծեմ` բանաստեղծութիւնը եկաւ ամբողջացնելու Հայաստանի հանդէպ կարօտը»,-խոստովանած է գրողը:

Գիրքը լոյս տեսած է ՀՀ կրթութեան, գիտութեան, մշակոյթի եւ սփորթի նախարարութեան, Հայաստանի գրողներու միութեան նախաձեռնութեամբ:

Այն հրատարակուած է 300 օրինակ տպաքանակով. շուտով հասանելի պիտի ըլլան գրախանութներուն մէջ: