3.09c
Երեվան
ուրբ, նմբ 08
Հոկտեմբերի 2-ին Ախալցխայի շրջանի մի խումբ բնակիչներ բարձրացան Ռաբաթի ամրոց եւ Շառլ Ազնավուրի աստղի մոտ ծաղիկներ խոնարհեցին նրա հիշատակին։ Մարդկանց վիշտը ու կորուստը մեծ էր, քանզի Ազնավուրը մեծ հայ եւ համաշխարհային նշանակության աստղ լինելուց բացի նաեւ արմատներով Ախալցխացի էր ու տվյալ քաղաքի պատվավոր քաղաքացի։
«Ազնավուրը այնպիսի մարդ էր, որ ամբողջ աշխարհի համար է սուգ եւ ոչ միայն մեզ համար։ Իհարկե մեզ համար ավելի ծանր է ու առավել շատ ենք մտահոգված, որ նման հայրենասեր զավակին կորցրինք, բայց շնորհակալ ենք, որ նա այդքան ապրեց։ Կարծես երեկ էր, որ մենք այս ամրոցում նրա համերգին էինք նստած»,-akhaltskha.net-ի հետ զրույցում, ասում է բանաստեղծ Մինաս Գրիգորենցը եւ ավելացնում, որ նրա կարծիքով Ազնավուրը պետք է դասվի մեծն Կոմիտասի շարքին։
Սամցխե-Ջավախքի Մեդիա Վերլուծական կենտրոնի տնօրեն Էդուարդ Այվազյանի խոսքերով արդեն երեկվանից մարդիկ բարձրանում եւ ծաղիկներ էին խոնարհում Շառլի աստղի մոտ եւ մարդկանց հոսքը անընդհատ շարունակվում է։ «Մենք շատ արագ որոշեցինք բարձրանալ Ազնավուրի աստղի մոտ ծաղիկներ խոնարհելու համար։ Շատերն էին զանգահարում ու ինտերնետի միջոցով գրում թե երբ բարձրանանք։ Այդ պատճառով facebook սոցիալական ցանցում գրառում կատարեցինք, որ հարազատներով եւ ընկերներով պետ է բարձրանանք ծաղիկներ խոնարհելու ժամը 11։00-ին։ Շառլ Ազնավուրի հանդեպ մարդկանց հարգանքը ու սերը այնքան մեծ էր, որ ընդամենը երկու ժամ չանցած բազմաթիվ մարդիկ միացան մեզ եւ մենք բոլորս միասին հարգանքի տուրք մատուցեցինք եւ ծաղիկներ խոնարհեցինք մեծն Շառլի աստղի մոտ։ Իհարկե շատերը նաեւ չիմացան այդ մասին, բայց մարդկանց հոսքը անընդհատ շարունակվում է»,- ասում է Էդուարդ Այվազյանը եւ ավելացնում, որ մաեստրոյի հուղարկավորության օրը հնարավոր է միասնական ուժերով ավելի մեծ միջոցառում կազմակերպվի եւ այդ մասին ժողովուրդը նախօրոք տեղյակ կպահվի։
Ախալցխացի Կիմա Հակոբյանի խոսքերով Շառլ Ազնավուրը իր երգերում մշտապես սեր ու համերաշխություն էր քարոզում եւ մենք հայերս շատ բան ունենք սովորելու մեծն Ազնավուրից, որպեսզի լինենք ավելի համերաշխ ու միաբանված։
Ախալցխացիների հետ միասին բազմաթիվ զբոսաշրջիկներ եւս կանգ էին առնում Շառլ Ազնավուրի աստղի մոտ եւ մեկ րոպե լռությամբ հարգում աշխարհահռչակ շանսոնյեի հիշատակը։
