Մարդ կայ հին է, բայց «գինի» է ... Մարդ ալ կայ նոր է, բայց մածունի պէս է

Մարդ կայ հին է, բայց  «գինի»  է ... Մարդ ալ կայ նոր է, բայց մածունի  պէս է

Այս կիրակի քանի որ տարին տակաւին թարմ է , օդն ալ մեր քով  պայծառ է , եկէք ձեզի հետաքրքրական առաջարկ մը ընեմ ` 

- Տօնական այս օրերուն ինչ որ  իրար մաղթեցիք,  եկէք բոլոր այդ մաղթանքները հաւաքեցէք ու ինծի ղրկեցէք , որպէսզի ձեւ  գտնեմ  ու ամբողջ տարին այդ մաղթանքները թարմ պահեմ ... Չեմ գիտեր ինչ կ'ընեմ... Թթու կը դնեմ,  աղ կը դնեմ կամ սառնարանը կը պահեմ... Բայց անպայման ձեր մաղթանքները թարմ պահելու միջոց մը կը գտնեմ,  յետոյ ամբողջ տարին զանոնք կ'օգտագործեմ  որպէսզի մեր ազգային կեանքին մէջի  հայհոյանքներն ու անէծքները հաւասարակշռեմ....  Թերևս այսպիսով ազգս ալ կը թարմացնեմ.... 

Չէ՞ք կարծեր որ մեր ազգային կեանքը շատոնց իր  թարմութիւնը  կորսնցուցած  է ու արդէն բաւական  նեխած է եւ պատճառը մեր այս  ներքին ատելութիւնն է ...Ուստի եթէ ես ձեր մաղթանքները  թարմ պահեմ,  անոնց միջոցով երեւի մեր ազգային կեանքը կը վերաթարմացնեմ.... 

Սակայն խնդիրը միայն մաղթանքները թարմ պահելով չի վերջանար,  պիտի նաեւ ազգը զտել ու բոլոր անոնք որոնք իրենց թարմութիւնը կորսնցուցած են,  առանց երկմտելու զանոնք աղբամանը նետել եւ այդպիսով ազգային նեխած մթնոլորտը բարելաւել... 

Սխալ չհասկնաք,  խօսքը այստեղ հինի կամ նորի մասին չէ , խօսքը ազգը թարմ պահելու մասին է ....

Որովհետեւ մարդ կայ  հին է  բայց գինի է , արժէքը միշտ բարձր է ... Իսկ մարդ ալ կայ  թէեւ նոր է  բայց մածուն է,  որքան ալ թարմ ըլլայ,  երկու օրէն կը թթուի կ'երթայ։ 

Ուստի այս կիրակի եթէ հին էք,  գինի եղէք... Իսկ եթէ նոր`  ոչ թէ մածուն այլ նուազագոյնը գոնէ կտոր մը պանիր եղէք,  որպէսզի նոյնիսկ եթէ բորբոսնիք,  ձեր արժէքէն չզրկուիք... 

Բայց չմոռնաք,  այդ գինիէն ու պանիրէն քիչ մը ինծի ալ ղրկեցէք,  որպէսզի այս կիրակի ես ալ քիչ մը խնայողութիւն ընեմ ու փոխանակ մանղալս վարեմ,  գինեսեղան մը պատրաստեմ...

 

Խաժակ Այնթապեան

Խաժակ Այնթապեան

Բժիշկ Ատամնաբոյժ Խաժակ Այնթապեան ծնած է 1 Յու...