15.09c
Երեվան
երք, հնս 24
«Ազդակ»էն կը կարդանք, որ Լիբանանի Վիճակագրութեան կեդրոնական վարչութեան ընդհանուր տնօրէն՝ Դոկտ. Մարալ Կիտանեան հրապարակեց հրաժեշտի խօսք մը` վիճակագրութեան ասպարէզին մէջ իր ծառայութեան աւարտին առիթով:
Դոկտ. Կիտանեան հրաժեշտի իր խօսքին մէջ հաստատեց, որ պաշտօնական վիճակագրութեան կարեւորութիւնը ամրագրելու ի խնդիր` 22 տարուան հաստատութենական իր ժրաջան աշխատանքը հասած է իր աւարտին:
Ան շեշտեց վիճակագրութեան պաշտօնական արդիւնքներուն հիման վրայ քաղաքական, ընկերային, տնտեսական եւ բարգաւաճման կարեւոր որոշումներ տալու կարեւորութիւնը:
Դոկտ. Կիտանեան շնորհակալութիւն յայտնեց բոլոր անոնց, որոնք գործակցեցան Վիճակագրութեան կեդրոնական վարչութեան հետ եւ իրենց ներդրումը ունեցան` երկրին շահերը նկատելով գերադաս:
Իր հրաժեշտի խօսքին մէջ ան շնորհակալութիւն յայտնեց բոլոր վարչապետներուն, յատկապէս` վարչապետի պաշտօնակատար՝ Նեժիպ Միքաթիին եւ կառավարութեան ընդհանուր քարտուղար, դատաւոր՝ Մահմուտ Մաքքիէին, որոնք ոչ մէկ ճիգ խնայեցին` Վիճակագրութեան կեդրոնական վարչութեան աշխատանքներուն զօրակցելու եւ անոր աշխատանքները դիւրացնելու իմաստով:
Դոկտ. Կիտանեան շնորհակալութիւն յայտնեց նաեւ իր բոլոր գործընկերներուն` մաղթելով, որ Վիճակագրութեան կեդրոնական վարչութիւնը իր աշխատանքով եւ հայրենիքին նկատմամբ նուիրուած ծառայութեամբ կը մնայ իւրայատուկ հաստատութիւն:
