image

Կը դատապարտենք Ատրպէյճանի նոր նախայարձակումը.

  Կը դատապարտենք Ատրպէյճանի նոր նախայարձակումը.

 

Հայրենակիցներ ու բարեկամներ, երբ Հայաստանի ինքնիշխանութիւնը վտանգի տակ է՝ կը նշանակէ որ հնչած է ահազանգը համազգային զօրակոչի:

 

Ռամկավար Ազատական Կուսակցութիւնը այսօր կոչ կ’ուղղէ համայն հայութեան, սարտարապատեան ոգիով միանալու եւ հաւաքաբար դիմակայելու ատրպէյճանական վտանգը:

 

 

Այսու կու գանք մեր ձայնը միացնելու բոլոր արդարամիտ շրջանակներու ձայնին, աներկբայօրէն դատապարտել Ատրպէյճանի նախայարձակումը Սեպտեմբեր 13ին, Հայաստանի ինքնիշխան տարածքներէն ներս թիրախ բռնելով Սօթքի, Ջերմուկի, Կապանի, Վարդենիսի շրջանները խլելով 49 զոհեր եւ բազմաթիւ վիրաւորեալներ:

 

Աշխարհի վրայ ամէն մէկ հայու պարտքն է անդրադառնայ այս տագնապալի կացութեան եւ առ այդ բարձրացնէ իր բողոքի ձայնը:

 

Իրենց հերթին պարտքն է Հայաստանի իշխանութեանց հզօր կերպով բողոքելու իրաւասու շրջանակներուն եւ առաւել եւս հակադարձէ Ատրպէյճանի եւ Թուրքիոյ կողմէ սանձազերծուած լրատու ե՛ւ մամուլի արշաւին, հնչեցնելու համար արդարութեան ձայնը:

 

Ատրպէյճանը խաղաղութեան պայմանագիր ստորագրելու պատրուակով բանակցութեան մէջ է Հայաստանի հետ եւ այս նախայարձակումով կը ջանայ պարտադրել իր սեփական պայմանները, որոնք կը միտին սպառնալ Հայաստանի ինքնիշխանութեան:

 

Երբ խնդրոյ առարկայ է ոեւէ երկրի ինքնիշխանութիւնը՝ առաջին հերթին ՄԱԿ-ը եւ համապատասխան մարմինները պէտք է հակազդեն առկայ վտանգին, որքան սատարելով խնդրոյ առարկայ զոհին, այլ նոյնպէս պահպանելով իրենց սկզբունքները՝ ազգերու միջեւ ներդաշնակութիւն եւ խաղաղութիւն պահպանելու:

 

Այս կապակցութեամբ կ’ողջունենք ֆրանսական իշխանութեանց նախաձեռնութիւնը ՄԱԿ-ի Ապահովութեան Խորհուրդի օրակարգին վրայ դնելու տագնապալի այս միջադէպը, նոյնպէս կ’ողջունենք Հայաստանի Ապահովութեան Խորհուրդի որոշումը դիմելու ՄԱԿ-ին, Ռուսաստանի Դաշնութեան եւ Հաւաքական Ապահովութեան Ուխտի կազմին, առաջքն առնելու համար այս նախայարձակման:

 

Հայաստան, իբրեւ լիիրաւ անդամ Հաւաքական Ապահովութեան Ուխտի կազմին իրաւունքն ունի արժեցնելու իր անդամակցութեան իրաւունքը եւ չդասաւորուելու Ատրպէյճանի կարգին որ անդամ չէ յիշեալ Ուխտին:

 

Ի վերջոյ ատենն է որ ստեղծուի ներքին միասնականութիւն Հայաստանի ժողովուրդին մէջ, ինչպէս նաեւ պետական կառոյցներէ ներս:  Անհասկնալի է եւ դատապարտելի խորհրդարանական ընդդիմութեան վերաբերումը չմիանալու մեծամասնութեան դատապարտելու ատրպէյճանական նախայարձակումը:

 

Հայրենակիցներ ու բարեկամներ, երբ Հայաստանի ինքնիշխանութիւնը վտանգի տակ է՝ կը նշանակէ որ հնչած է ահազանգը համազգային զօրակոչի:

 

Ռամկավար Ազատական Կուսակցութիւնը այսօր կոչ կ’ուղղէ համայն հայութեան, սարտարապատեան ոգիով միանալու եւ հաւաքաբար դիմակայելու ատրպէյճանական վտանգը:

 

 ՌԱՄԿԱՎԱՐ ԱԶԱՏԱԿԱՆ ԿՈՒՍԱԿՑՈՒԹԻՒՆ

Պոստոն