14.09c
Երեվան
հնգ, նմբ 21
2 Սեպտեմբերին Սուրբ Գայիանէ վանքին մէջ, նախագահութեամբ Մայր Աթոռի Եկեղեցական հայեցակարգային բաժնի տնօրէն Գերաշնորհ Տ. Վազգէն եպիսկոպոս Միրզախանեանի, կատարուած է 31 Օգոստոսին «Քորոնա» ժահրի հետեւանքով վախճանած Մայր Աթոռ Սուրբ Էջմիածնի միաբան Հոգեշնորհ Տ․ Մաղաքիա վարդապետ Ամիրեանի հոգեհանգստեան արարողութիւնը:
3 Սեպտեմբերին Մայր Աթոռ Ս. Էջմիածնի միաբանական գերեզմանատան մէջ տեղի ունեցած է ննջեցեալ Հայր Սուրբի յուղարկաւորութեան արարողութիւնը:
Այս վշտալի առիթով, Սուրբ Գայիանէ վանքին մէջ, նախագահութեամբ Ն.Ս.Օ.Տ.Տ. Գարեգին Երկրորդ Ծայրագոյն Պատրիարք եւ Ամենայն Հայոց Կաթողիկոսի, մատուցուած է Սուրբ Պատարագ ձեռամբ Տաւուշի թեմի առաջնորդ Գերաշնորհ Տ․ Բագրատ եպիսկոպոս Գալստանեանի։
Սրբազան արարողութեան ընթացքին Ամենայն Հայոց Հայրապետի գլխաւորութեամբ եկեղեցականաց դասը, բարձրանալով Սուրբ Խորան, իր վերջին հրաժեշտի խոնարհումը բերաւ հանգուցեալ Հայր Մաղաքիային։
Սուրբ Պատարագի աւարտէն ետք, նախագահութեամբ Գուգարաց թեմի առաջնորդ Գերաշնորհ Տ. Յովնան եպիսկոպոս Յակոբեանի, կատարուեցաւ ննջեցեալ Հայր Սուրբի թաղման կարգը: Հոգեշնորհ Տ. Մաղաքիա վարդապետ Ամիրեանի աճիւնը ամփոփուեցաւ Մայր Աթոռ Սուրբ Էջմիածնի միաբանական գերեզմանատան մէջ:
