Իսրայէլի նախագահին այցը շրջադարձային պիտի ըլլայ երկու երկիրներու յարաբերութիւններուն մէջ. Էրտողան

Իսրայէլի նախագահին այցը շրջադարձային պիտի ըլլայ երկու երկիրներու յարաբերութիւններուն մէջ. Էրտողան

Թուրքիոյ նախագահ Ռեճեպ Թայիպ Էրտողան յայտնած է, որ իր իսրայէլցի գործընկերոջ այցը շրջադարձային պիտի ըլլայ երկու երկիրներու լարուած յարաբերութիւններուն մէջ:

«Ես կը կարծեմ, որ այս պատմական այցը նոր շրջադարձային պահ պիտի ըլլայ թուրք-իսրայէլեան յարաբերութիւններուն մէջ: Մեր ընդհանուր նպատակը փոխադարձ շահերու վրայ հիմնուած քաղաքական երկխօսութիւնը վերակենդանացնելն է», ըսած է Էրտողան, Անգարայի մէջ Իսրայէլի նախագահ Իսհաք Հերցոկի հետ հանդիպման արդիւնքներով կայացած մամուլի ասուլիսին ընթացքին: 

Աւելի վաղ Էրտողանը յայտնած էր, որ երկու երկիրները կրնան համագործակցիլ իսրայէլեան բնական կազը Եւրոպա մատակարարելու հարցին մէջ:

Հերցոկ ըսած է, թէ երկու երկիրները պէտք է խոստովանին, որ ամէն ինչի մէջ համաձայն պիտի չըլլան: «Սակայն մենք կը ձգտինք լուծելու մեր տարաձայնութիւնները փոխադարձ յարգանքի եւ բարի կամքի պայմաններու մէջ, համապատասխան մեխանիզմներու եւ հաստատութիւններու միջոցով, որոնք մենք պիտի զարգացնենք միասին, եւ ընդհանուր ապագայի մեր համատեղ տեսլականով», ըսած է ան:

Յիշեցնենք, որ Թուրքիոյ եւ Իսրայէլի միջեւ դիւանագիտական յարաբերութիւնները կտրուկ վատթարացած էին 2018-ին, երբ անոնք արտաքսեցին դեսպանները Կազայի սահմանին ցոյցերէն յետոյ, որոնց ընթացքին 60 պաղեստինցի սպաննուեցաւ: