-2.91c
Երեվան
շբթ, հնվ 24
Յունուար 21-ին Հայ Եկեղեցւոյ այսպէս կոչուած բարենորոգման շարժման ինքնահռչակ համակարգող խորհուրդի անունով տարածուած է յայտարարութիւն, որով հերթական անգամ կը խեղաթիւրուին իրողութիւնները եւ փորձ կը կատարուի մոլորեցնելու հաւատաւոր մեր ժողովուրդը։ Այս մասին ըսուած է Մայր Աթոռի տարածած յայտարարութեան մէջ:
«Մայր Աթոռ Սուրբ Էջմիածինը խորապէս ցաւում է հակաեկեղեցական արշաւին ու դրանում ներգրաւուած կարգալոյծներին համախորհուրդ տաս եպիսկոպոսների որդեգրած պառակտիչ ընթացքի համար։
Իրականութիւնն այն է, որ Հայաստանի վարչապետի նախաձեռնած շարժմանը յարող եպիսկոպոսներին Մայր Աթոռ Սուրբ Էջմիածնից ուղղուած յորդորներն ու հրաւէրները ցայսօր մնացել են անպատասխան եւ անտեսուել են կանոնական դաշտ վերադառնալու, խնդիրները եկեղեցական ատեաններում քննելու առաջարկները։ Միեւնոյն ժամանակ թէ՛ անցեալում, թէ՛ առաւել եւս այսօր յիշեալ եպիսկոպոսների կողմից որեւէ կերպ չեն մատնանշուել իրատեսական ճանապարհները Եկեղեցու եւ իշխանութիւնների միջեւ յարաբերութիւնների կարգաւորման ուղղութեամբ, ընդհակառակը՝ ակնյայտ ազդեցութեան ներքոյ շարունակ փորձեր են կատարում խնդիրները հանգուցալուծելու ոչ կանոնական դատապարտելի ուղիներով։
Անընդունելի է կասկածի տակ դնել եկեղեցական մարմինների իրաւազօրութիւնը, որոնց աշխատանքներին տասնամեակներ շարունակ յիշեալ եպիսկոպոսներից շատերը իրենց մասնակցութիւնն են բերել, որոշումներ ընդունել եւ պատասխանատւութիւն ստանձնել Եկեղեցու գործունէութեան հետ առնչուած։ Այս կապակցութեամբ անհրաժեշտ պարզաբանումներ արդէն իսկ պաշտօնապէս տրուել են։
Իշխանութիւնների հակասահմանադրական քայլերի հետեւանքով ստեղծուած մտահոգիչ իրավիճակի յաղթահարման ճանապարհներից է նաեւ հրաւիրեալ Եպիսկոպոսաց ժողովը, որի կանոնականութիւնը որեւէ կերպ չի պայմանաւորւում գումարման վայրով։ Եկեղեցական կեանքը յուզող կարեւորագոյն հարցերը, այդ թւում՝ բարձրաձայնուող խնդիրները, պէտք է քննութեան առնուեն եւ պատշաճ լուծումներ գտնեն Եկեղեցու ընկալեալ կարգի համաձայն, բացառապէս եկեղեցական ժողովական մարմիններում։ Հարկ չկայ կանխակալ տրամադրութիւններ ձեւաւորել եւ հիմնազուրկ պատճառաբանութիւններով ու կեղծ մեղադրանքներով փորձել ձախողել ժողովի գումարումը արտերկրում, երբ ակնյայտ են եկեղեցականութեան հանդէպ Հայաստանում տարատեսակ բռնաճնշումները։
Եկեղեցական կեանքի վերանորոգումը եւ զօրացումը շարունակական գործընթաց է, որը պահանջում է աղօթական միութիւն, տեւական ու միասնական աշխատանք եւ ուխտապահութիւն։
Հաւատարիմ իր Տէրունաշնորհ առաքելութեանը՝ Մայր Աթոռ Սուրբ Էջմիածինը ինչպէս անցեալում, այնպէս էլ այսօր եկեղեցական աշխարհասփիւռ կառոյցներով իր ջանքերն է բերելու ի նպաստ հայոց անկախ պետականութեան զօրացման, մեր ժողովրդի խաղաղ, բարօր ու առաջընթաց կեանքի»,-ըսուած է յայտարարութեան մէջ:
