Եթէ Թայուանի վերամիաւորումը ձախողի, չենք հրաժարիր ուժի դիմելէ. Փէքինէն կարծր դիրքորոշում

Եթէ Թայուանի վերամիաւորումը ձախողի, չենք հրաժարիր ուժի դիմելէ. Փէքինէն  կարծր  դիրքորոշում

Չինաստան չի հրաժարիր ուժի սենարէն. եթէ Թայուանի հետ խաղաղ վերամիաւորումը ձախողի, Փէքինն իրեն իրաւունք կը վերապահէ պատասխանելու կղզիի անկախութեան կողմնակիցներու եւ արտաքին ուժերու սադրանքներուն, ըսուած է Չինաստանի իշխանութիւններու հրապարակած Սպիտակ գիրքին մէջ: Այս մասին կը հաղորդէ «ՌԻԱ Նովոստի»-ն։

«Թայուանի հարցը եւ Չինաստանի վերամիաւորման գործը նոր դարաշրջանի մէջ» վերնագրով փաստաթուղթը համատեղ պատրաստուած եւ հրապարակուած է Չինաստանի Պետական խորհուրդի Թայուանի գործերով գրասենեակի եւ Պետական խորհուրդի մամուլի գրասենեակի կողմէ։

«Սպիտակ գիրքերը» պարբերաբար կը հրապարակուին՝  պարզաբանելու Փեքինի քաղաքականութիւնը տարբեր հարցերու վերաբերեալ։

«Թայուանի անկախութեան հասնելու փորձերը կղզին կը մղեն միայն դէպի աղէտի անդունդը եւ լուրջ վնաս կը հասցնեն թայուանցի հայրենակիցներուն: Չինացի ազգի, այդ շարքին՝ թայուանցի հայրենակիցներու ընդհանուր շահերը պաշտպանելու համար մենք պէտք է վճռականօրէն դէմ ըլլանք Թայուանի մասնատման եւ անկախութեան, եւ նպաստենք հայրենիքի խաղաղ վերամիաւորման»,-ըսուած է փաստաթուղթին մէջ։

Նաեւ նշուած է, որ Փեքին «պատրաստ է լայն տարածութիւն ստեղծել խաղաղ վերամիաւորման համար, սակայն մենք երբեք չենք արտօներ անջատողական գործունէութեան տարբեր ձեւրը՝ Թայուանի անկախութեան հասնելու համար»։

Փաստաթուղթի հեղինակները յայտարարած են, որ չինացիներու հարցերը պէտք է լուծեն իրենք՝ չինացիները, իսկ Թայուանի հարցը Չինաստանի ներքին գործն է, ուստի հարցի լուծումը «չի հանդուրժեր արտաքին որեւէ միջամտութիւն»։

«Այն պարագային, երբ թայուանամէտ անջատողական ուժերը կամ արտաքին միջամտող ուժերը սադրեն կամ հատեն կարմիր գիծը, մենք ստիպուած կ'ըլլանք կտրուկ գործողութիւններ ձեռնարկելու», - ըսուած է «Սպիտակ գիրք»ին մէջ:

Թայուանի շուրջ իրավիճակը սրուած է ԱՄՆ Ներկայացուցիչներու պալատի նախագահ Նենսի Փելոսիի վերջերս կղզի կատարած այցէն ետք:

Չինաստան Թայուանն իր նահանգը կը համարէ եւ դէմ է անոր ներկայացուցիչներու որեւէ շփման՝ այլ երկիրներու իշխանութիւններու հետ, որոնց հետ Փեքինը դիւանագիտական յարաբերութիւններ հաստատած է։ Թայուանի հարցը Ուաշինկթընի եւ Փեքինի յարաբերութիւններուն մէջ առանձնակի կարեւորութիւն ձեռք բերաւ Ուքրանիոյ մէջ ստեղծուած իրավիճակէն ետք։ Չինաստան ընդգծած է, որ պատմական եւ քաղաքական պատճառներով նմանութիւնները տեղին չեն, եւ պահանջած է չմիջամտել ներքին գործերուն։ ԱՄՆ, պաշտօնապէս պահպանելով «մէկ Չինաստանի սկզբունքը» եւ չունենալով դիւանագիտական յարաբերութիւններ Թայփէյի հետ, ոչ միայն կապեր կը պահպանէ կղզիի հետ, այլեւ պարբերաբար զէնք կը մատակարարէ այնտեղ, նկատած է աղբիւրը։