-2.91c
Երեվան
երկ, դկտ 22
Գարնան զարթօնքով լեցուն մարտի 8-ի այս տօնական օրը Մայր Աթոռ Սուրբ Էջմիածնից Հայրապետական Մեր օրհնութիւնն ու շնորհաւորանքն ենք բերում մեր մայրերին, քոյրերին ու դուստրերին եւ երախտագէտ սրտով մեծարում նրանց նուիրեալ ու սիրառատ ջանքերը ընտանեկան կեանքի բարօրութեան ապահովման գործում, ինչպէս նաեւ` գովարժան աւանդը պետական ու հասարակական կեանքի տարբեր ասպարէզներում:
Սիրելի մայրէր եւ քոյրեր, ընտանիքին ու հայրենիքին ձեր նուիրումով են պահպանւում եւ սերնդեսերունդ փոխանցւում մեր ազգային աւանդոյթները, ձեր հոգատար դաստիարակութեամբ են հասակ առնում ազգի եւ Եկեղեցու արժանաւոր զաւակները, ովքեր մեր պատմութեան վճռորոշ հանգրուաններում, ինչպէս նաեւ արցախեան պատերազմի օրերին եւ ներկայիս, իրենց սխրանքներով ու անձնազոհութեամբ հերոսանում են հայրենեաց պաշտպանութեան սրբազան առաքելութեան մէջ:
Այսօր ամէնքիս պարտքն է անխոնջ աշխատանքով ապահովել մեր երկրի անվտանգ ու խաղաղ ապագան, միասնական ոգով աջակից լինել Արցախում շրջափակման մէջ գտնուող մեր ժողովրդին, առանձնակի հոգածութիւն եւ ուշադրութիւն ցուցաբերել մեր վիրաւորուած զաւակներին եւ նահատակ քաջորդիների ընտանիքներին:
Հայրապետիս աղօթքն ու մաղթանքն է, որ Տէրը հաստատուն պահի տիկնանց եւ օրիորդաց հաւատքի, բարի գործերի ու առաքինութիւնների մէջ եւ շնորհի արեւշատ կեանքի երջանիկ օրէր: Հայցում ենք, որ Բարձրեալն Աստուած խաղաղ ու բարօր պահպանի մեր հայրենիքը եւ մեր աշխարհասփիւռ ժողովրդին` պարգեւելով ուժ ու կորով` կերտելու իր լուսաւոր ապագան:
Մեր Տէր Յիսուս Քրիստոսի շնորհները, սերն ու խաղաղութիւնը թող լինեն ձեզ ամէնքիդ հետ. ամէն:
