29.09c
Երեվան
երկ, հլս 08
ԱՄՆ -ի Հայոց Առաքելական Եկեղեցւոյ Արեւելեան Թեմի Առաջնորդ՝ Գերշ. Տ. Մեսրոպ եպս. Պարսամեան այցելած է զանազան հայկական եկեղեցիներ ու համայնքներ եւ մասնակցած տօնական միջոցառումներու։ Ան ներկայ գտնուած է Սուրբ Համբարձման, Սուրբ Գրիգոր Լուսաւորիչ, Սուրբ Վարդան Մայր տաճար եւ Սուրբ Լեւոն հայկական եկեղեցիները, ինչպէս նաեւ Սրբոց Նահատակաց հայկական ամենօրեայ վարժարան։
«Արեւելք» այս մասին վերահասու դարձաւ Թեմի պաշտօնական էջէն, ուր Գերշ. Տ. Մեսրոպ եպս. Պարսամեան գրած է՝
«Սիրելիներ, յոյսով եմ, որ ունեցաք օրհնեալ շաբաթավերջ մը: Անցեալ շաբաթավերջին ես օրհնուած էի, քանի որ առիթը ունեցայ այցելելու ոչ միայն մէկ, այլեւ հինգ համայնքներ, որոնցմէ իւրաքանչիւրը լեցուած էր Աստուծոյ սիրոյ լոյսով եւ այդ հաւատացեալ համայնքի ուրախութեամբ:
Ուրբաթ՝ Շաբաթավերջը սկսաւ Թրամպուլի Քոնէքթիքաթ նահանգի Սուրբ Համբարձման հայկական եկեղեցի, ուր նշեցինք Տէր Ընձակ Նալպանտեանի քահանայութեան 45-ամեակը եւ անոր երկրորդ գիրքի հրատարակման գինեձօնը: Այդ ուրախ առիթ էր պատուելու հոգեւորական մը, որ իր ամբողջ կեանքը նուիրած է Աստուծոյ եւ համայնքի ծառայութեան:
Շաբաթ՝ Շարունակեցի «Ուայթ Փլէյնզ»ի Սուրբ Գրիգոր Լուսաւորիչ հայկական եկեղեցի՝ նշելով Սուրբ Գրիգոր Լուսաւորիչի վիրապէն դուրս գալու տօնը: Այս յիշեցում էր Աստուածային փրկութեան եւ հաւատքի յարատեւ եւ հզօր ուժին մասին : Աւելի ուշ միացայ Սրբոց Նահատակաց հայկական ամենօրեայ վարժարանի հրաշալի համայնքին՝ անոնց կազմակերպած բարեկամական Կալա ընթրիքին ներկայ գտնուելու համար: Մեր երիտասարդներուն եւ անոնց կրթութեան հանդէպ սէրն ու աջակցութիւնը իսկապէս ոգեշնչող էին:
Կիրակի՝ Ճանապարհորդութիւնս շարունակեցի դէպի Սուրբ Վարդան Մայր տաճար, ուր տօնակատարեցինք Սուրբ Էջմիածինի տօնը եւ աղօթեցինք մեր Մայր Աթոռին համար: Վերջապէս, ուրախութիւնը ունեցայ ներկայ գտնուելու Սուրբ Լեւոն հայկական եկեղեցւոյ ամենամեայ ուտեստի փառատօնին: Կենսունակ տօնախմբութիւնը, բարեկամութիւնը եւ բաժնեկցուող ժպիտները վարակիչ էին` օրը դարձնելով յիշարժան:
Իւրաքանչիւր այցելութիւն զիս կը յիշեցնէր այն անհաւատալի օրհնութիւնները, զորս մենք կը կիսենք, որպէս թեմ եւ Քրիստոսով ընտանիք: Եկէք շարունակենք կառուցել մեր հոգեւոր զոհասեղանները հաւատքով, նուիրումով և երախտագիտութեամբ: Միասին մենք կը փայլեցնենք Քրիստոսի լոյսը աշխարհով մէկ»:
