-0.91c
Երեվան
չրք, դկտ 24
2026-ի փետրուարին ԱՄՆ փոխնախագահ Ճէյ Տի Վենսը պիտի այցելէ Հայաստան։ Այս մասին դիմատետրեան իր էջին գրած է «Յանուն Հանրապետութեան» կուսակցութեան նախագահ Արման Բաբաջանեանը:
«Սա պարզապէս բարձր մակարդակի սովորական այց չէ․ սա փաստ է, որ Վաշինգտոնը արագ անցնում է օգոստոսի 8-ի պայմանաւորուածութիւնների գործարկմանը։
Այսպիսի այցերը արժէքաւոր են կոնկրետութեամբ։ Հայաստանը պարտաւոր է հանդէս գալ յստակ, չափելի փաթեթով։
Առաջինը՝ ներդրումային նախագծեր TRIPP-ի ենթակառուցուածքների համար՝ ճանապարհ, լոգիստիկ կեդրոններ, պահեստաւորում, բեռնափոխադրում, ապահովագրութիւն, սպասարկող տնտեսութիւն եւ այլն։
Երկրորդը՝ սահմանային եւ մաքսային կարողութիւնների արագ արդիականացում՝ հակամաքսանենգ համակարգեր, ամբողջական թուայնացում, կիբեռպաշտպանութիւն, բեռնափոխադրումների վերահսկելիութիւն։ Երրորդը՝ իրաւական երաշխիքներ՝ թափանցիկ պայմանագրեր, անկախ վերահսկողութիւն, ռիսկերի կանխարգելում, ներդրողի եւ պետութեան շահի հաւասարակշռուած պաշտպանութիւն։
Ամերիկեան ներգրաւուածութիւնը հնարաւորութիւն է՝ Հայաստանը դարձնելու կապի, վստահութեան ու անվտանգութեան հանգոյց։ Դրան միանշանակ հնարաւոր է հասնել կարգապահութեամբ, պրոֆեսիոնալիզմով եւ պետական շահը պաշտպանող կոնկրետութեամբ։
ԱՄՆ փոխնախագահի այցի գլխաւոր արդիւնքը պէտք է լինի ոչ միայն ծրագրերի մեկնարկը, այլեւ այն ուղերձը, որը նախեւառաջ պէտք է հնչի Հայաստանի քաղաքացիներին․ մեր անկախութիւնն ու ինքնիշխանութիւնը պարզապէս հռչակուած գաղափար չեն, այլ պաշտպանուող ռազմավարական ընտրութիւն։ Այդ թւում ի դէմս ԱՄՆ-ի, այդ ընտրութիւնն ունի իրական գործընկերներ, գործիքներ ու չափելի աջակցութիւն՝ անվտանգութիւն, ներդրումներ եւ կայուն զարգացում ձեւաւորելու համար»,- գրած է Բաբաջանեանը:
