10.34c
Երեվան
չրք, ապր 22
Թուրքիոյ կողմէ վար առնուած «Սուխոյ 24» կործանիչին վար առնուիլը անկիւնադարձային դէպք մը ըլլալէ բացի ծանրագոյն իրավիճակի կը հասցընէ երկար ժամանակէ ի վեր առանց ատոր ալ անհանգիստ վիճակ ունեցող Ռուսիա- Թուրքիա յարաբերութիւնները: Անվստահութիւնը եւ Սուրիոյ նախագահ Պաշշար Ասատի ճակատագրին մասին առկայ տարակարծութիւնը այսօր կը մտնէ իր վատագոյն հանգրուանը: Տեղին է յիշատակել, որ Թուրքիոյ նախագահն ու վարչապետը անցնող մէկ շաբթուան ընթացքին առանց դադարի կը խօսին Սուրիոյ թուրքմէններուն դէմ եղած զինուորական գործողութիւններուն մասին: Այստեղ պէտք է նաեւ ընդգծել, որ «Ժապալ Թըրքան»ը (լուսանկար) ռազմավարական կարեւորութիւն կը ներկայացնէ Թուրքիոյ համար երկու հիմնական պատճառներով: Առաջին, որ այդ շրջանը կը համարուի Թուրքիոյ թուրքմէններուն եւ Սուրիոյ թուրքմէններուն միջեւ հիմնական հանգուցային կէտը եւ երկրորդ, որ Թուրքիա խորապէս անհանգիստ է Սուրիոյ բանակին վերջին շրջանին Ղումամ, Զուայք, Նապըհ Ալ Մըր եւ Ժապալ Ահմար շրջաններուն տիրապետութեամբ: Ու նաեւ չի բացառուիր, որ այսօրուան ընթացքով եւ ռուսական օդուժին օգնութեամբ գրանցուող յառաջխաղացքը պատճառ դառնայ, որ թրքական սահմանային թիւրքմէն բնակչութիւն ունեցող գաւառները Սուրիոյ բանակին համար դառնան բաց թիրախներ: Եւ ամէնէն կարեւոր կէտը այն է, որ սուրիական ուժերուն այդ շրջանին տիրապետումը կարեւոր խաղաքարտ պիտի դառնայ յառաջիկային կազմուելիք ցանկացած բանակցութիւններու սեղանին համար: Չմոռնամ ըսել, որ շրջանին մէջ կայ Կարմիր Լեռը («Ալ Ժապալ Ալ Ահմար») որ կը համարուի շրջանին մէջ գտնուող ամէնէն բարձր եւ ռազմավարական կէտը: Այս բոլորէն անդին կը մնայ կարեւորագոյն հարցումը. արդեօ՞ք թուրք- ռուսական «բաց հակամարտութեան» մը շեմին ենք: Երկար ժամանակէ ի վեր Նէօ-Օսմանեան դիրքերէ խօսող Էրտողան յայտնուած է Ռուսիոյ նոր ցարին հարուածային տեսադաշտին ճիշդ կեդրոնը: Իսկ այս վտանգաւոր խաղին ամէնէն մեծ շահաւորը բնականաբար Միացեալ Նահանգներն են, որ կարծես թէ յաջողեցան ամբողջ Թուրքիան ռազմավարական մեծ թակարդի մը մէջ գլորել:
Ս. Ա.
