27.41c
Երեվան
հնգ, հլս 16
Լիբանանի արտաքին գործոց նախարար Եուսէֆ Ռաժին յայտարարած է, որ երկրի զինուած ուժերու նպատակը «աստիճանաբար իրենց իշխանութիւնը տարածելն է Լիբանանի ամբողջ տարածքին վրայ, ներառեալ՝ հարաւը»։ Այս մասին կը հաղորդէ Լիբանանի Ազգային լրատուական գործակալութիւնը (NNA)։
Փարիզի մէջ, Ֆրանսայի Ծերակոյտի կազմակերպած համաժողովին ընթացքին արտասանած իր խօսքին մէջ, նախարարը նշած է, որ այս նպատակին իրականացումը կախեալ է Լիբանանի ամբողջ տարածքէն իսրայէլեան ուժերու լիակատար դուրսբերումէն։
«Ոչ մէկ պետութիւն կրնայ ամբողջացնել իր հիմնարկներու եւ ինքնիշխանութեան կառուցումը, քանի դեռ իր տարածքին մէկ մասը բռնագրաւուած է։ Բռնագրաւումը կը տկարացնէ պետական հաստատութիւնները, կը խորացնէ լարուածութիւնը, կը յետաձգէ քաղաքական եւ անվտանգային կայունութեան վերականգնումը եւ կը խոչընդոտէ պետութեան՝ իր ամբողջ տարածքին վրայ լիարժէք վերահսկողութիւն իրականացնելու կարողութիւնը»,– ըսած է Ռաժին։
Նախարարը նաեւ նշած է, որ «Հըզպալլա»-ի ռազմական ներկայութեան վերջ տալու որոշումը «ո՛չ արտաքին ճնշումներու արձագանգ էր, ո՛չ ալ դիւանագիտական բանակցութիւններու արդիւնք, այլ զուտ ազգային կամքի արտայայտութիւն, որ պետութիւնը չի կրնար ամբողջովին վերականգնել իր հեղինակութիւնը, քանի դեռ գոյութիւն ունին զինեալ խմբաւորումներ, որոնք կը գործեն անոր սահմանադրական լիազօրութիւններէն դուրս»։
