7.09c
Երեվան
շբթ, ապր 05
Օրերս, նախագահութեամբ Յունաստանի Հայոց Թեմի (Կիլիկեան Թեմ) առաջնորդ՝ Գերշ. Տ. Սահակ Եպս. Եմիշեանի տեղի ունեցած է Սուրբ եւ Անմահ պատարագ, որուն յաջորդած է Միջինքի աւանդական ճաշկերոյթ մը: Ճաշկերոյթի ընթացքին Հոգշ. Տ. Եզրաս Վրդ. Թէնէքէճեանին շնորհուած է վարդապետական լանջախաչ կրելու իրաւունք:
Այս մասին «Արեւելք» տեղեկացաւ Թեմի պաշտօնական էջէն:
Ստորեւ հրապարակուած տեղեկատւութիւնը՝
Նախագահութեամբ Յունաստանի Հայոց Թեմի (Կիլիկեան Թեմ) առաջնորդ՝ Գերշ. Տ. Սահակ Եպս. Եմիշեանի, Կիրակի, 23 Մարտ 2025 Սուրբ եւ Անմահ պատարագէն ետք տեղի ունեցաւ Միջինքի աւանդական ճաշկերոյթը:
Սուրբ Պատարագին հանդիսապետեց ու յաւուր պատշաճի քարոզեց Սրբազան հայրը: Տնտեսին առակը վերառնելով, որուն յիշատակութեան օրն էր, Սրբազանը խօսեցաւ առակէն եկող պատգամներու մասին: Իր խօսքին մէջ սրբազանը դիտել տուաւ, թէ ամէն մարդ իր ունեցած շնորհնքները, կարողութիւնները պէտք է օգտագործէ ուրիշին օգտակար դառնալու, ինչպէս կատարեց անիրաւ տնտսեը:
Հոգեպարար արարողութեան յաջորդեց սիրոյ սեղանը, որ կազմակերպուած էր Սուրբ Գրիգոր Լուսաւորիչ Եկեղեցւոյ տիկնանց յանձնախումբին կողմէ:
Առաջնորդ սրբազան հայրը օրհնեց սեղանը եւ ողջունեց ներկաները: Ապա ողջոյնի խօսքով հանդես եկաւ նաեւ հոգաբարձութեան ատենապետուհի՝ Էֆֆի Չոպանեան: Ներկաները մեծ խանդավառութեամբ վայելեցին մտերմիկ մթնոլորտը, որը զարդարուեցաւ նուէրներու բաշխումով:
Ճաշկերոյթի ընթացքին Առաջնորդ Սրբազանը ընթերցեց Հայրապետական կոնդակը՝ Հոգշ. Տ. Եզրաս Վրդ. Թէնէքէճեանին շնորհելով վարդապետական լանջախաչ կրելու իրաւունք եւ նուիրեց ականակուռ լանջախաչ մը:
Աւարտին առաջնորդ սրբազան հայրը իր գնահատական խօսքը ուղղեց տիկնանց յանձնախումբի անդամներուն, որոնք անշահախնդիր ձեւով ամէն ջանք ի գործ կը դնեն Եկեղեցւոյ ծառայութեան համար:
