4.09c
Երեվան
ուրբ, դկտ 26
Կառավարութիւնն աւելի քան 7 միլիառ դրամի ներդրումային ծրագիր հաստատած է, որու շրջածիրէն ներս Վաղարշապատի մէջ պիտի կառուցուին նոր մարզադաշտ եւ ֆութպոլային ակադեմիա։ Ծրագիրը ներկայացուցած է «Իմեջին Երեւան» ընկերութիւնը, որու հիմնադիրը «Նոա» ֆութպոլային ակումբի նախագահն է:
Ծրագրի իրականացման նպատակով ընկերութիւնը համայնքէն ուղղակի վաճառքի միջոցով ձեռք պիտի բերէ շուրջ 24 հեքթար հողատարածք։ Գործարքէն համայնքային պիւտճէ պիտի մտնէ 688 միլիոն դրամ։
Նախագիծը կը նախատեսէ կառուցել միջազգային չափանիշերուն համապատասխան մարզադաշտ, մանկապատանեկան ֆութպոլային ակադեմիայի նոր շէնք, մարզական կեդրոն, ինչպէս նաեւ անհրաժեշտ օժանդակ ենթակառուցուածքներ՝ սնունդի, ժամանցի եւ կայանման գօտիներով։
«Նոա» ֆութպոլային ակումբը հանդէս կու գայ Հայաստանի Բարձրագոյն խումբին մէջ եւ վերջին տարիներուն աշխուժօրէն ներգրաւուած եղած է ֆութպոլային ենթակառուցուածքներու զարգացման նախաձեռնութիւններուն մէջ։ 2023-ին ակումբի նախագահը ձեռք բերած է Վաղարշապատի ֆութպոլային ակադեմիայի տարածքը՝ ներդրումային ծրագրի նախապատրաստական փուլի շրջածիրէն ներս։
Շինարարական աշխատանքներուն պիտի մասնակցին միջազգային փորձ ունեցող նախագծային եւ ճարտարապետական ընկերութիւններ, այդ շարքին՝ Populous (Մեծն Բրիտանիա), GMP (Գերմանիա), Herzog & de Meuron (Զուիցերիա), STRI Group եւ Aspire Sports Turf։
Կառավարութիւնը ծրագրին հաւանութիւն տուած է՝ այն դիտարկելով որպէս տնտեսական, ընկերային եւ մարզական ենթակառուցուածքներու զարգացման խթան։ Նախագիծի շրջածիրէն ներս կը նախատեսուի ստեղծել առնուազն 100 նոր աշխատատեղ, իսկ ծրագրի աւարտէն ետք՝ շարունակական զբաղուածութիւն ակադեմիայի, մարզադաշտի եւ «Նոա» ակումբի գործունէութեան սպասարկման շրջածիրէն ներս։
