9.09c
Երեվան
երկ, մրտ 16
Մարտ 13-ին ընտանիքի հետ հեռախօսազրոյցի ժամանակ Ռուբէն Վարդանեանը փորձած է հրապարակային կոչով դիմել Ատրպէյճանի մարդկային իրաւանց պաշտպան Սապինա Ալիեւային, բայց հեռախօսազրոյցը հարկադրաբար ընդհատուած է։ Այս մասին ըսուած է «Ռուբէն Վարդանեան» դիմատետրեան էջին հրապարակուած՝ անոր ընտանիքի յայտարարութեան մէջ:
«Ռուբէն Վարդանեանը ստիպուած է եղել դիմել այս քայլին, քանի որ նախորդ 10 օրերին օմբուդսմենի հետ փաստաբանի միջոցով, գրաւոր դիմումներով եւ հեռախօսազանգերով կապ հաստատելու փորձերը որեւէ արդիւնք չեն տուել:
Դատավարութիւններն աւարտուել են մէկ ամիս առաջ, սակայն ո՛չ Ռուբէնը, ո՛չ էլ, մեր տեղեկութիւններով, միւս հայ բանտարկեալներն իրենց պաշտօնական դատավճիռների տեքստերը որեւէ լեզուով՝ ռուսերէն, հայերէն կամ ադրբեջաներէն, դեռ չեն ստացել: Նրանք չգիտեն, թէ ինչ յօդուածներով են դատապարտուել, երբ կամ ուր են նրանց տեղափոխելու։
Մենք խորապէս մտահոգուած ենք ստեղծուած իրավիճակով: Նրա եւ միւս հայ գերիների կացութեան մասին արժանահաւատ տեղեկութիւնների բացակայութիւնը եւ Ադրբեջանում մարդու իրաւունքների անկախ մեխանիզմների վերացումը, այդ թւում՝ երկրից Կարմիր Խաչի միջազգային կոմիտէի հեռացումը, բոլոր գերիներին զրկում են ինստիտուցիոնալ որեւէ պաշտպանութիւնից»,-ըսուած է Վարդանեան ընտանիքի յայտարարութեան մէջ։
Ռուբէն Վարդանեանի ընտանիքի անդամները մտավախութիւն ունին, որ նոյնիսկ կարճ հեռախօսազրոյցները՝ կապի պահպանուած միակ միջոցը, կրնան դադրեցուիլ։
«Մենք հրապարակում ենք Ադրբեջանի օմբուդսմեն Սաբինա Ալիեւային ուղղուած Ռուբէնի դիմումի աուդիոձայնագրութիւնը, որը նրան թոյլ չեն տուել աւարտել։
Յոյսով ենք՝ այն կը հասնի հասցէատիրոջը»,-ըսուած է յայտարարութեան մէջ:
