13.09c
Երեվան
հնգ, հկտ 22
Ուրբաթ, 16 Հոկտեմբեր 2026-ին, յետմիջօրէի ժամը 5:00-ին, Քեսապի Սուրբ Միքայէլ Հայ Կաթողիկէ եկեղեցւոյ մէջ, ընդառաջելով Տանն Կիլիկիոյ Կաթողիկէ Հայոց Ն.Ա.Գ.Տ.Տ. Ռաֆայէլ Պետրոս ԻԱ. Կաթողիկոս Պատրիարքի կոչին, Քեսապի հայ կաթողիկէ հաւատացեալները միացան աշխարհի բոլոր այն հաւատաւոր ժողովուրդներուն, որոնք աղօթք կը բարձրացնեն առ Աստուած՝ Նորին Սրբութիւն Լեւոն ԺԴ. Սրբազան Քահանայապետին առողջութեան, շուտափոյթ ապաքինման եւ զօրացման համար։
Աղօթական երեկոն սկիզբ առաւ Սուրբ Վարդարանի աղօթքով, որմէ ետք մատուցուեցաւ Սուրբ եւ Անմահ Պատարագ՝ ձեռամբ Գերյ. Հայր Գառնիկ Ծ. Վրդ. Յովսէփեանի։
Եկեղեցւոյ դասին մէջ ներկայ էր նաեւ Հոգեշնորհ Տէր Վահրիճ Վարդապետ Ղարախանեանը՝ Քեսապի Հայ Առաքելական Սուրբ Աստուածածին եկեղեցւոյ հոգեւոր տեսուչը։
Սուրբգրային ընթերցումներէն ետք, Գերյ. Հայր Սուրբը իր քարոզին մէջ ըսաւ.
«Սիրելի՛ քոյրեր եւ եղբայրներ ի Քրիստոս,
Այսօր մենք համախմբուած ենք մեր սիրելի Սուրբ Միքայէլ եկեղեցւոյ մէջ՝ մեր սրտերն ու հոգիները միացնելու մէկ սուրբ նպատակի շուրջ՝ աղօթելու համար մեր սիրելի Սրբազան Քահանայապետին՝ Լեւոն ԺԴ. Պապին առողջութեան, շուտափոյթ ապաքինման եւ զօրացման համար։
Այս պահը պարզապէս աղօթքի հաւաք մը չէ։ Ան մեր հաւատքի արտայայտութիւնն է, մեր սիրոյ վկայութիւնը եւ Եկեղեցւոյ համընդհանուր միասնութեան գեղեցիկ նշանը։
Մենք՝ Քեսապի հայ կաթողիկէ հաւատացեալներս, մեր աղօթքները կը միացնենք աշխարհի բոլոր այն հաւատացեալներուն, որոնք իրենց սրտերը դէպի Աստուած կը բարձրացնեն՝ խնդրելով, որ Տէրը Իր օրհնութեամբ ու ողորմութեամբ զօրացնէ Սրբազան Քահանայապետը։
Սիրելինե՛րս,
Երբ հիւանդութիւնը կը տկարացնէ մարմինը, հաւատքը կը զօրացնէ հոգին, իսկ աղօթքը մեր յոյսը կը կապէ Աստուծոյ անսահման սիրոյն։
Մեր Տէր Յիսուս Քրիստոս Իր երկրային կեանքին ընթացքին յատուկ սէր եւ գթասրտութիւն ցուցաբերեց հիւանդներուն հանդէպ։ Ան մօտեցաւ անոնց, լսեց անոնց աղաղակը, մխիթարեց զանոնք եւ բժշկեց շատերը։ Աւետարանը մեզի կը յիշեցնէ, թէ Աստուած անտարբեր չէ մարդուն տառապանքին հանդէպ։ Ան կը մօտենայ մեզի մեր նեղութիւններուն մէջ եւ կը հրաւիրէ մեզ վստահելու Իր հայրական սիրոյն։
Այսօր մենք այդ նոյն վստահութեամբ մեր աղօթքը կը բարձրացնենք առ Աստուած՝ մեր սիրելի Քահանայապետ Լեւոն ԺԴ. Պապին համար։
Ան, որ կոչուած է հովուելու Քրիստոսի Եկեղեցին, այսօր ինք եւս ունի մեր աղօթքներուն, սիրոյն եւ հոգեւոր զօրակցութեան կարիքը։
Սրբազան Քահանայապետը իր առաքելութեան ընթացքին շարունակ կը հրաւիրէ հաւատացեալները՝ աղօթելու, սիրելու, ներելու եւ խաղաղութիւն տարածելու։ Այսօր մենք ալ կը փափաքինք մեր երախտագիտութիւնը արտայայտել անոր հանդէպ՝ աղօթքով, որ սիրոյ ամենէն անկեղծ արտայայտութիւններէն մէկն է։
Ի՜նչ մխիթարական է գիտնալ, որ վիրահատութենէն ետք Սրբազան Քահանայապետը կը շարունակէ ապաքինիլ, կը մասնակցի Սուրբ Պատարագին եւ կը վերսկսի իր աշխատանքային գործունէութիւնը՝ բժշկական խնամքի եւ հսկողութեան ներքոյ։
Սակայն այս ուրախ լուրերուն մէջ մենք նաեւ կարեւոր դաս մը կը սորվինք. կեանքը Աստուծոյ պարգեւն է, առողջութիւնը՝ թանկագին շնորհք, իսկ իւրաքանչիւր նոր օր՝ երախտագիտութեամբ ապրելու առիթ։
Երբեմն մարդը իր առօրեայ զբաղումներուն մէջ կը մոռնայ, թէ որքան թանկագին է առողջութիւնը, որքան կարեւոր է աղօթքը եւ որքան մեծ է սիրող սրտի մը զօրութիւնը։
Հիւանդութեան պահերը մեզի կը սորվեցնեն կանգ առնել, վերանայիլ մեր կեանքը, աւելի մօտենալ Աստուծոյ եւ աւելի գորովանքով նայիլ մեր եղբայրներուն ու քոյրերուն։
Այսօր մեր աղօթքը միայն Սրբազան Քահանայապետին համար չէ։ Ան նաեւ աղօթք է աշխարհի բոլոր հիւանդներուն, վիրահատութեան ենթարկուածներուն, հիւանդանոցներուն մէջ բուժուողներուն, անոնց ընտանիքներուն եւ բոլոր անոնց համար, որոնք լուռ տառապանքով կը սպասեն բժշկութեան ու մխիթարութեան։
Թող մեր աղօթքը հասնի նաեւ անոնց, որոնք իրենց ցաւին մէջ մինակ կը զգան իրենք զիրենք, որոնք յուսահատութեան դէմ կը պայքարին եւ որոնք այսօր կարիքը ունին մէկ բարի խօսքի, մէկ ջերմ ժպիտի կամ մէկ անկեղծ աղօթքի։
Այս աղօթական պահուն մեր հայեացքը կը բարձրացնենք նաեւ դէպի Սուրբ Կոյս Մարիամը՝ մեր երկնաւոր Մայրը, Եկեղեցւոյ Մայրը եւ հիւանդներու մխիթարութիւնը։
Մարիամ Աստուածածինը խաչին ստորոտը կանգնեցաւ Իր Որդիին տառապանքին դիմաց՝ հաւատքով եւ սիրով։ Ան մեզի համար յոյսի օրինակ է, որովհետեւ նոյնիսկ ցաւի ու տառապանքի պահերուն մնաց Աստուծոյ կամքին հաւատարիմ։
Այսօր մենք կը խնդրենք Սուրբ Կոյս Մարիամէն, որ Իր մայրական բարեխօսութեամբ ուղեկցի Սրբազան Քահանայապետին, մխիթարէ զինք ապաքինման այս ընթացքին եւ անոր սրտին մէջ պահպանէ խաղաղութիւնն ու վստահութիւնը։
Թող Սուրբ Մարիամը նաեւ մխիթարէ բոլոր հիւանդները, զօրացնէ անոնց ընտանիքները եւ յոյս ներշնչէ անոնց, որոնք դժուար օրեր կ՚անցընեն։
Այսօրուան մեր հաւաքը թող չսահմանափակուի միայն այս ժամով։ Թող աղօթքը շարունակուի մեր տուներուն մէջ, մեր ընտանիքներուն շրջանակին մէջ եւ մեր ամէնօրեայ կեանքին ընթացքին։ Երբ ընտանիքով կը հաւաքուինք, յիշենք Սրբազան Քահանայապետը մեր աղօթքներուն մէջ։
Այսօր, երբ մեր աղօթքները կը բարձրացնենք առ Աստուած, թող մեր սրտերէն բխի հաւատքի եւ յոյսի այս աղերսը.
Տէ՛ր, պահէ՛ մեր Սրբազան Քահանայապետ Լեւոն ԺԴ. Պապը Քու սիրոյդ եւ ողորմութեանդ մէջ։
Օգնէ՛ անոր, որ վիրահատութենէն ետք լիովին ապաքինի, նոր ուժ ստանայ եւ շարունակէ իր սուրբ առաքելութիւնը՝ Քու Եկեղեցւոյդ ծառայութեան համար։
Թող Տէրը պարգեւէ անոր բժշկութիւն, զօրութիւն, խաղաղութիւն եւ երկար տարիներու օրհնեալ ծառայութիւն՝ Իր Սուրբ Եկեղեցւոյն եւ համայն մարդկութեան համար։
Սրբազա՛ն Քահանայապետ, մեր աղօթքներով միացած ենք Ձեզի»։
Գերյ. Հայր Գառնիկ Ծ. Վրդ. Յովսէփեան շնորհակալական խօսք ուղղեց իր հոգեւոր եղբօր՝ Տէր Վահրիճ Վարդապետ Ղարախանեանին՝ ըսելով.
«Հոգեշնո՛րհ Հայր Սուրբ,
Քեսապի Հայ Կաթողիկէ Սուրբ Միքայէլ եկեղեցւոյ անունով մեր խորին շնորհակալութիւնն ու անկեղծ երախտագիտութիւնը կը յայտնենք Ձեզի՝ Ձեր ներկայութեան եւ մասնակցութեան համար այս աղօթական պահուն, որ նուիրուած էր Նորին Սրբութիւն Լեւոն ԺԴ. Սրբազան Քահանայապետին առողջութեան եւ շուտափոյթ ապաքինման։
Ձեր ներկայութիւնը մեզի համար ուրախութիւն եւ պատիւ է, որովհետեւ ան կը վկայէ, թէ Քրիստոսի մէջ մենք մէկ ընտանիք ենք, եւ աղօթքը, եղբայրական սէրն ու փոխադարձ յարգանքը կը միացնեն մեզ՝ հակառակ մեր եկեղեցական աւանդութիւններու տարբերութիւններուն։
Թող այս եղբայրական հանդիպումը նոր առիթ մը ըլլայ մեր համայնքներուն միջեւ սիրոյ, փոխադարձ յարգանքի, գործակցութեան եւ աղօթական միութեան ամրապնդման։
Մեր աղօթքն է, որ Ամենակալ Աստուած Իր երկնային օրհնութիւնները հեղու Ձեր վրայ, զօրացնէ Ձեզ Ձեր հոգեւոր ծառայութեան մէջ եւ պարգեւէ Ձեզ առողջութիւն, իմաստութիւն, խաղաղութիւն ու անսպառ եռանդ՝ ի սպաս մեր սիրելի Քեսապի ժողովուրդին եւ մեր Սուրբ Եկեղեցիներուն։
Շնորհակալ ենք, Հոգեշնո՛րհ Հայր, որ Ձեր ներկայութեամբ պատուեցիք մեր աղօթական հաւաքը եւ մեզի հետ բաժնեցիք այս հոգեւոր պահուն խորհուրդն ու օրհնութիւնը։
Թող Տէրը միշտ պահէ ու պահպանէ Ձեզ Իր Սուրբ Աջին հովանիին ներքեւ, եւ թող Սուրբ Աստուածածինն ու Սուրբ Միքայէլ Հրեշտակապետը բարեխօսեն Ձեր եւ մեր բոլոր համայնքներուն համար»։
Իր կարգին, Հոգեշնորհ Տէր Վահրիճ Վարդապետ Ղարախանեան իր սրտաբուխ խօսքը փոխանցեց հաւատացեալներուն՝ անդրադառնալով Նոր Կտակարանի բժշկութեան հրաշքներուն եւ հաւատքի զօրութեան։
Ան ըսաւ.
«Նոր Կտակարանին մէջ յիշատակուած Քրիստոսի հրաշքները շատ են, սակայն բժշկութեան ամենէն վառ օրինակներէն մէկը Հայրոսի աղջկան բժշկութիւնն է։
Ժողովրդապետ Հայրոսը, հակառակ իր դիրքին ու հեղինակութեան, ծնրադիր կ՚աղաչէ Յիսուսին՝ ըսելով. «Աղջիկս մահամերձ է, եկո՛ւր, ձեռքդ դիր վրան, որպէսզի բժշկուի եւ ապրի»։
Հայ Եկեղեցւոյ հայրերը կը շեշտեն, որ բժշկութեան ու հրաշքի առաջին քայլը մարդկային հպարտութենէն հրաժարիլն է եւ անկեղծ, խոնարհ աղօթքով Քրիստոսի դիմելը։
Այսօր Եկեղեցին ու հաւատացեալ ժողովուրդը, Հայրոսի նման, ծնրադիր աղօթք կը բարձրացնեն՝ խնդրելով Նորին Սրբութիւն Լեւոն ԺԴ. Պապին առողջութիւնն ու շուտափոյթ ապաքինումը, որովհետեւ Աստուծոյ առջեւ խնդրողին հաւատքը կը դառնայ բժշկութեան աղբիւր։
«Մի՛ վախնար, միայն հաւատա»։ Երբ տունէն լուր կը հասնի, թէ «աղջիկդ մեռաւ, ալ ինչո՞ւ կը նեղես Վարդապետը», Յիսուս Հայրոսին կ՚ըսէ անմահական խօսքը. «Մի՛ վախնար, միայն հաւատա»։
Հայ Եկեղեցւոյ քարոզչութիւնը կը հաստատէ, որ աշխարհի անյոյս ու մութ լուրերուն դիմաց Քրիստոսի խօսքը կը մնայ յոյսի ու կեանքի վահանը։
Բժշկական ախտորոշումները, տագնապներն ու մարմնաւոր տկարութիւնները յաճախ վախ ու երկիւղ կը յառաջացնեն մարդոց սրտերուն մէջ։
Սակայն Քրիստոսի այս պատգամը՝ «Մի՛ վախնար, միայն հաւատա», այսօր ալ կը հնչէ Լեւոն ԺԴ. Պապին եւ համայն Եկեղեցւոյ համար։ Անիկա կը հրաւիրէ չվհատիլ հիւանդութեան առջեւ, այլ հաւատքով ապաւինիլ Երկնաւոր Բժիշկին։
Քրիստոս՝ կեանքի եւ յարութեան Տէրը. «Տալիթա՛ Քումի»
Յիսուս տուն մտնելով՝ կը բռնէ աղջկան ձեռքը եւ կ՚ըսէ. «Տալիթա՛ Քումի», որ կը թարգմանուի՝ «Աղջի՛կ, քեզի կ՚ըսեմ, ե՛լ»։ Եւ աղջիկը իսկոյն ոտքի կը կանգնի։
Հայ Եկեղեցւոյ ուսուցման համաձայն՝ Քրիստոսի համար չկայ անբուժելի հիւանդութիւն կամ վերջնական մահ. Անոր ձայնը կենդանարար է եւ կեանք պարգեւող։
Քրիստոսի բժշկարար ձեռքը, որ հպեցաւ Հայրոսի աղջկան, նոյն զօրութեամբ այսօր կը հպի բոլոր աղօթողներուն եւ հիւանդներուն։
Հայ Առաքելական Եկեղեցին, քրիստոնէական սիրոյ եւ եղբայրութեան ոգիով, իր աղօթքը կը միացնէ Սրբազան Քահանայապետ Լեւոն ԺԴ. Պապին շուտափոյթ ապաքինման համար, որպէսզի ան Տիրոջ կենդանարար աջով վերագտնէ իր մարմնաւոր ու հոգեւոր ուժերը եւ շարունակէ իր հովուական սրբազան առաքելութիւնը։
Հայրոսի աղջկան բժշկութիւնը մեզի կը սորվեցնէ, որ աղօթքն ու հաւատքը սահմաններ չունին։ Ինչպէս Յիսուս լսեց Հայրոսի աղաչանքը, այնպէս ալ այսօր կը լսէ Եկեղեցւոյ աղօթքները՝ քաջալերելով, բժշկելով եւ զօրացնելով Լեւոն ԺԴ. Պապը՝ իր ապաքինման ճանապարհին»։
Սուրբ Պատարագէն ետք, երկու հոգեւոր եղբայրները միասիրտ աղօթեցին հետեւեալ աղօթքը.
«Տէ՛ր Յիսուս Քրիստոս,
Դուն ես կեանքի աղբիւրը եւ մեր յոյսին հիմքը։ Քու ամենազօր եւ գթառատ ձեռքերուդ կը յանձնենք մեր Սրբազան Քահանայապետ Լեւոն ԺԴ. Պապը։
Պարգեւէ՛ անոր արագ եւ ամբողջական ապաքինում, նորոգէ՛ անոր մարմնին ուժերը եւ սիրտը լեցուր Քու խաղաղութեամբդ։
Օրհնէ՛ բոլոր բժիշկներն ու բուժաշխատողները, որոնք հոգ կը տանին անոր։ Առաջնորդէ՛ զանոնք իրենց ծառայութեան մէջ։
Սուրբ Կոյս Մարիամի բարեխօսութեամբ լսէ՛ մեր աղաչանքները եւ շնորհէ՛ մեզի այն շնորհքները, որոնց կարիքը ունինք։
Թող մեր աղօթքը դառնայ սիրոյ վկայութիւն, մեր հաւատքը՝ յոյսի լոյս, եւ մեր համայնքը՝ եղբայրական միութեան կենդանի օրինակ։
Այս բոլորը կը խնդրենք Քեզմէ, ո՛վ Տէր, որ կ՚ապրիս եւ կը թագաւորես յաւիտեանս յաւիտենից։ Ամէն»։
Աւարտին, եկեղեցւոյ կից սրահին մէջ տեղի ունեցաւ կոկիկ հիւրասիրութիւն մը, որ կազմակերպուած էր եկեղեցասէր Տիկնանց Միութեան յանձնախումբին կողմէ։
Քեսապ, 16 Հոկտեմբեր 2026
Գերյ. Հայր Գառնիկ Ծ. Վրդ. Յովսէփեան
Սուրբ Միքայէլ եկեղեցւոյ ժողովրդապետութիւն
.jpg)
