Հայաստան պէտք է դիմէ Միջազգային հանրութեան.Դոկտ. Յակոբ Այնթապլեան

 Հայաստան պէտք է դիմէ Միջազգային հանրութեան.Դոկտ. Յակոբ Այնթապլեան

Ամերիկահայ հասարարական գործիչ, մտաւորական ՝ Դոկտ. Յակոբ Այնթապլեան կը գրէ՝ 

Հայաստան պէտք է դիմէ Միջազգային Դատարան 

 

Հայաստան լուրջ սահմանային, հողային հարցեր ունի՝ Թուրքիոյ, Ազրպէյճանի, նուազ չափով՝ Վրաստանի, եւ նուազագոյնս՝ Պարսկաստանի հետ։ Ուստի, ներկայիս՝ պարտուած Հայաստանը, միջազգային օրէնքները խախտած սահմանակիցներուն՝ Ազրպէյճան-Թուրքիա դաշնութեան հետ կ՚ուզէ խաղաղութեան համաձայնագիր կնքել, հողամասեր զիջելով։ Հայաստանի վարչակարգը ո՛չ քաղաքական եւ ոչ ալ ռազմական ուժը ունի դիմակայելու Թուրքիոյ կամ Ազրպէյճանի։ Ուստի, զիջումներու միջոցով պիտի ստանայ «Պայմանագիր» մը, որպէսզի կարենայ իր խախուտ դիրքը պահել։ Հայերս ունինք պատմական, միջազգային վաւերաթուղթեր, որոնց հիման վրայ կարելի է դիմել եւ մեր հայրենի հողին տէր կանգնիլ միջազգային դատարանին մէջ։ Այո՛, Հայաստան պէտք է դիմէ Միջազգային Դատարան եւ հոն մէկ անգամ ընդմիշտ Հայաստանի ներկայիս բզկտուած սահմանները՝ միջազգային օրէնքով լուծէ, եւ ոչ թէ սպառնալիքի ուժի ներքոյ՝ աւելիով հողատարածք զիջի։

Հայաստան միջազգայնօրէն վաւերացուած սահմաններ պէտք է ունենայ բռնազաւթող Թուրքիոյ եւ Ազրպէյճանի հետ եւ վիճելի տարածքները պէտք է յստակեցուին Վրաստանի եւ Իրանի հետ։

Միջազգային օրէնքով հաստատուած սահմանները վերջ կու տան Ազրպէյճանի ոռնոցին եւ Թուրքիոյ դաւադիր սպառնալիքներուն։

Ներկայի անիմաստ եւ կէս կատար, կիսարդիւնաբեր բանակցութիւնները Ազրպէյճանի եւ Թուրքիոյ հետ, անհեռատես եւ վնասակար են ե՛ւ Հայաստանի, ե՛ւ հայութեան հողային ամբողջականութեան։

Պարտուած՝ հող զիջած Հայաստանի վարչակարգը Թուրք-Ազերի դաշինքին չի կրնար դիմակայել։ Ստիպուած պիտի ենթարկուի անոնց պահանջներուն եւ ստորագրէ ազգակործան պայմանագրեր։ «Ոչխար մը բորենիէն եւ գայլէն ոչինչ կրնայ կորզել, բացի իր դմակը վտանգի ենթարկելէ», կ՚ընէ իմաստուն առածը։

Հայաստան ունի հաստատ վաւերագրեր, որոնց վրայ հիմնուելով եւ նախորդ վարչակարգերուն սխալ որոշումները ճշդելով, կ՚ունենայ նուազագոյն 160.000քքմ հողային տարածք։ Ի՞նչ հիման վրայ այս եզրակացութեան կարելի է հասնիլ։ Թուեմ։

1- 1920-ին Ազգերու Լիկան, Հայաստանին յատկացուցած է հողատարածք՝ նեռարեալ՝ Նախիջեւան, 7 շրջանները, Լեռնային ու Դաշտային Ղարաբաղը։

2- Կարս, Արտահան եւ շրջակայ հայկական հողատարածքը, որ 1920-ին Պոլշեւիկները Թուրքիոյ նուիրեցին։

3- Վիլսոնեան իրաւարար վճիռով Հայաստանին յատկացուած Արեւմտեան Հայաստանի 4 նահանգներու՝ Վանի, Պիթլիսի,Կարինի (Էրզրում) եւ Տրապիզոնի հողատարածքներուն մեծ մասը։

Հայաստանի Սահմանազատումը եւ Սահմանագծումը պէտք է յանձնել Միջազգային դատարանին։ Պարտուած ու ստորացուած Հայաստանի վարչակարգը «Թղթէ շերեփով» պէտք չէ մրցի «Երկաթէ շերեփ» ունեցող թուրքին ու ազերիի հետ, պատառ քաղելու համար։

Հայաստանն ու հայ ազգը՝ միջազգային հաստատ եւ կայուն իրաւասութիւնը ունին իրենց պատմական եւ պապենական հողերուն տիրելու համար։ Նախընտրելի է այս հարցը մէկ անգամ ընդմիշտ Միջազգային Դատարանին մէջ լուծուի եւ խաղաղութիւնը Միջազգայնօրէն երաշխաւորուի, քան թէ արիւնարբու թուրքին եւ ազերիին քմահաճոյքին ենթարկուելով, 5-էն 20 տարին անգամ մը ներխուժման ենթարկուի։

Հայաստան ոչ ուժը եւ ոչ ալ կարողութիւնը ունի թուրք-ազերիի հողատարածքային ախորժակը կեցնելու։

Պարզ է, որ այս արիւնարբուները միասնաբար որոշած են Հայաստանը կմախքի վերածել։ Այդ ախոժակը կրնայ զսպել միայն Միջազգային Դատարանը եւ անոնց միջոցով՝ գերտէրութիւնները։

Ներկայիս, հայերս այդ ուժերուն պէտք է ապաւինինք, որպէսզի մեր պապենական հողերուն տիրանանք եւ երաշխիք ունենանք, որ գազանաբարոյ ցեղեր մեր երկիրն ու ժողովուրդը չբզկտեն։

Հայաստանի, ներկայ պարտուած վարչակարգը հեռատեսութիւնն ու խոհեմութիւնը պէտք է ունենայ, անկարող ու պարտուած դիրքով, չշարունակէ Հայաստանի հողային սակարկութիւնը, այլ յանձնէ մէկ անգամ ընդմիշտ Միջազգային Դատարանին, որպէսզի վերջնական լուծում տրուի դար մը տեւող հայկական հարցին։

Եթէ այդ խոհեմութիւնը չունենայ ներկայ Հայաստանի վարչակարգը եւ շարունակէ այս ընթացքը, ան պիտի երթայ հողային զիջումներու, թէ՛ պատմական Հայաստանէն, եւ թէ՛ Արցախէն։

Յուսանք, որ ներկայ վարչակարգին մէջ ողջամտութիւնը կը գերազանցէ, եւ միջազգային դատարանին կը թողուն Հայաստանի հողային պատկանելիութեան որոշումը։