30.62c
Երեվան
ուրբ, հլս 17
Միացեալ Նահանգներու զինուորականներն աւարտած են Իրանի ուղղութեամբ հերթական հարուածներու շարքը, յայտնած է Միացեալ Նահանգներու Զինուած ուժերու Կեդրոնական հրամանատարութիւնը (CENTCOM)։
«CENTCOM-ը Իրանի դէմ հարուածներու երեկոյեան ալիքն աւարտած է յուլիս 15-ին՝ ԱՄՆ արեւելեան ափի ժամանակով ժամը 21:00-ին: ԱՄՆ զինուած ուժերը խոցած են իրանական հրամանատարական կեդրոններ, ՀՕՊ համակարգերու, հրթիռներու եւ անօդաչու թռչող սարքերու տեղակայման վայրեր, ինչպէս նաեւ առափնեայ դիտակէտեր», -ըսուած է հրամանատարութեան հաղորդագրութեան մէջ:
Ինչպէս նշած են CENTCOM-էն, ամերիկեան զինուորականները կիրառած են բարձր ճշգրտութեան զինամթերք, հարուածներ հասցուած են, ի թիւս այլ վայրերու, նաեւ Պանտար-Ապպաս քաղաքին։
Իսլամական յեղափոխութեան պահակագունդը իր հերթին հարուածներ հասցուցած է Քուէյթի մէջ ԱՄՆ Ալի ալ-Սալեմ ռազմակայանին մէջ ամերիկացի զինծառայողներու տեղակայման վայրին։
«Քուէյթի Ալի ալ-Սալեմ օդուժի ռազմակայանի C-RAM վաղ նախազգուշացման ռատարային համակարգը, ինչպէս նաեւ ամերիկեան զօրքերու տեղակայման շրջանը դարձած են համակցուած հարուածի թիրախներ «Նասր-2» գործողութեան ութերորդ ալիքի ընթացքին»,- Press TV հեռուստաալիքը մէջբերած է Իսլամական յեղափոխութեան պահակագունդի յայտարարութիւնը։
Իսլամական յեղափոխութեան պահակագունդի ուժերը հարուածներ հասցուցած են նաեւ Յորդանանի մէջ ամերիկեան Ալ-Ազրաք ռազմակայնին։ Այս մասին յայտնած է Mehr գործակալութիւնը։
Վերջինիս տուեալներով՝ Իսլամական յեղափոխութեան պահակագունդը խոցած է ԱՄՆ Զինուած ուժերու կապի համակարգերը եւ վառելիքի պահեստները։
