-1.91c
Երեվան
չրք, հնվ 15
Ստորեւ «Արեւելքի» ընթերցողներին ենք ներկայացնում Հայց. Առաքելական Եկեղեցու Գերմանիայի Թեմի Առաջնորդ՝ Գերշ. Տ. Սերովբէ եպս. Իսախանեանի տարեմուտի խօսքը։
Գերմանահայ համայնքի սիրելի անդամներ,
սիրելի եղբայրներ եւ քոյրեր ի Քրիստոս,
2025-ի տարեմուտին ցանկանում եմ այս ճանապարհով Ձեզ փոխանցել իմ սրտաբուխ բարեմաղթանքները։
Անցնող տարին մեզնից շատերի համար մարտահրաւէրների, բայց նաեւ շնորհալեցուն ժամանակ էր: Մենք միասին դիմակայեցինք այն խնդիրներին, որոնք կեանքը դրեց մեր առջեւ եւ այդ ընթացքում նորից ու նորից ապրեցինք հաւատի ուժն ու մեր համայնքի ջերմութիւնը:
Երախտագիտութեամբ եմ հետադարձ հայեացք նետում անցնող տարուան, երբ մենք, հակառակ բոլոր դժուարութիւններին, կարողացանք մեր մէջ զգալ Քրիստոսին ու Նրա աստուածային լոյսը։ Մենք կարողացանք որպէս Համայնք Աստծոյ օրհնութեամբ ու օգնութեամբ եւ սիրոյ, համախմբուածութեան ու փոխադարձ աջակցութեան շնորհիւ նոր ուղիներ գտնել, որպէսզի իրար մօտ լինենք, մեր համայնքային կեանքը լաւագոյն ձեւով կազմակերպենք։ Սուրբ պատարագներն ու եկեղեցական արարողութիւնները, մեր երիտասարդական ու մանկական ձեռնարկները եւ մեր բազմաթիւ մշակութային նախաձեռնութիւնները դարձան յոյսի եւ ոգեշնչման աղբիւրներ՝ նորոգեալ ուժով Նոր տարին սկսելու համար։
Գնահատանքով եւ օրհնութեամբ շնորհակալութիւն եմ յայտնում մեր հոգեւորականներին, սարկաւագներին, դպիրներին, երգչախմբերին, համայնքային վարչութիւններին, թեմական խորհրդին, թեմական պատգամաւորներին, դպրոցական, երիտասարդական ու տիկնանց յանձնախմբերին եւ բոլոր նրանց, որոնք իրենց ժամանակը, կարողութիւններն ու սէրը ծառայեցրել են մեր Եկեղեցւոյ եւ Համայնքի համար։ Ձեր նուիրուածութեամբ ու ջանքերով ակնյայտ դարձաւ, թէ որքան կենսունակ է հաւատքը մեր Համայնքի մէջ։ Թող Աստուած բազմապատիկ փոխհատուցի Ձեր ջանքերը։
Այժմ, երբ սկսում ենք Նոր տարին, հայցում եմ մեր երկնաւոր Հօրը՝ առատ օրհնութիւն բերի Ձեզ ու Ձեր ընտանիքներին։ Թող այս տարին լինի խաղաղութեան, առողջութեան եւ հաւատքի ամրապնդման տարի բոլորիս, մեր սիրելի Հայաստանի, Գերմանիայի եւ ամբողջ աշխարհի համար։ Եկէք այս Նոր տարում եւս մնանք միաբան ու աղօթքով կապուած, հաւաքուենք մեր Եկեղեցւոյ եւ համայնքների շուրջ, որպէսզի միասին վկայենք այն սիրոյ եւ յոյսի մասին, որ մեզ պարգեւում է մեր Տէր Յիսուս Քրիստոս։
«Ամուր պահենք աներեր յոյսի դաւանութիւնը, քանի որ հաւատարիմ է նա, ով խոստացաւ։ Եւ հոգ տանենք միմեանց՝ սիրոյ եւ բարի գործերի յորդորելով եւ զանց չառնենք մէկտեղ հաւաքուելը, ինչպէս սովոր են անել ոմանք, այլ խրախուսենք միմեանց, եւ այդ այնքան աւելի, որքան տեսնում էք Տիրոջ օրուայ մօտենալը» (Եբր․ Ժ 23-25)։
Այս խօսքերի լոյսի ներքոյ Ձեզ մաղթում եմ բարի եւ օրհնեալ Նոր տարի։ Թող Տէրը առաջնորդի, զօրացնի եւ օրհնի մեզ բոլորիս այսօր եւ մեր կեանքի բոլոր օրերին։
Ձերդ՝
Սերովբէ Սրբազան
