6.09c
Երեվան
կրկ, փտր 22
«Հայաստան» դաշինքը յայտարարութեամբ հանդէս եկած է՝ նշելով՝ քանի դեռ կայ այս իշխանութիւնը, զիջումները պիտի ըլլան ամէն օր։
«Պարտութեան խորհրդանիշ իշխանութիւնը հերթական պայմանաւորուած զիջումն արեց․ Գորիս-Կապան ճանապարհն Ատրպէյճանն այլեւս ամբողջութեամբ վերցրել է իր վերահսկողութեան տակ: Կապիտուլյանտը յայտարարում էր՝ այդ ճանապարհով միշտ ազատեղաշարժուելու ենք: Հանրութեանը խաբում էր հերթական անգամ: Հիմա յայտարարում է այլընտրանքային ճանապարհի մասին:
Քանի դեռ այս վարչախումբը իշխանութեան է, նման խայտառակ զիջումները սպասելի են ամէն օր: Վարչապետի պաշտօնը զբաղեցնողն այլեւս ոչինչ չի որոշում: Նրա փոխարէն որոշումներ կայացնում է Ատրպէյճանը: Հայաստանի սուվերեն տարածքում հակառակորդը ոչ միայն ֆիզիքապէս է ներկայ, այլ նաեւ տեղադրում է մաքսային ու սահմանային հսկողութեան կէտեր: Այս իշխանութիւնն անկարող է, չի դիմադրելու Ատրպէյճանին:
Բայց մենք չենք համակերպուելու:
Փաստօրէն, տարածաշրջանում խաղաղութեան դարաշրջան բացելու՝ վարչախմբի օրակարգը նշանակում է Հայաստանի ինքնիշխանութեան կորուստ: Կատարուածը ուղղակի սպառնալիք է՝ Սիւնիքի մարզի մեր հայրենակիցների անվտանգութեան, Հայաստանի պաշտպանունակութեան առումով: Սա նաեւ տնտեսական լուրջ եւ անկառավարելի ռիսկեր է բովանդակում:
Սիրելի հայրենակիցներ, ստեղծուած աղէտալի վիճակի այլընտրանքը պատերազմը չէ, ինչպէս փորձում են ներկայացնել: Այլընտրանքը արժանապատիւ խաղաղութիւնն է, ազգային-պետական շահը պաշտպանող նոր իշխանութեան ձեւաւորումը: Մենք սկզբնաւորել ենք համազգային դիմադրութիւն իշխանութեան կործանարար քաղաքականութեան դէմ: Այսօրուայ խնդիրը դիմադրութեան հզօրացումն է, ամէնօրեայ աշխատանքն ու շարունակական ակցիաները: Մենք ճնշումների, ուժային կառոյցների բռնարարքների դէմ չենք ընկճուելու, գնալու ենք մինչեւ վերջ: Սիւնիքը չի զիջուելու, Արցախը չի հայաթափուելու, Հայաստանը չի թուրքացուելու։
