35.31c
Երեվան
հնգ, հլս 30
Սէուտական Արաբիոյ պաշտպանութեան նախարար իշխան Խալիտ պըն Սալման, Միացեալ Նահանգներու փոխնախագահ Ճէյ Տի Վենսի հետ ունեցած հանդիպման ընթացքին, կոչ ըրած է Ուաշինկթընին՝ ձեռնպահ մնալու հուսիները հարուածելէ։ Այս մասին կը հաղորդէ Reuters գործակալութիւնը՝ յղում կատարելով աղբիւրներու։
Axios-ի լրագրող Պարաք Ռաւիտ աւելի վաղ հաղորդած էր, որ իշխան Խալիտ Վենսի հետ քննարկած է Մերձաւոր Արեւելքի մէջ լարուածութեան սրումը՝ Իրաքի մէջ իրանամէտ զինեալ խմբաւորումներու դէմ վերջերս Միացեալ Նահանգներու եւ Սէուտական Արաբիոյ գործադրած համատեղ հարուածներէն ետք։
«Համատեղ գրոհներէն ետք, Սէուտական Արաբիոյ պաշտպանութեան նախարարը Չորեքշաբթի օր Ուաշինկթընի մէջ հանդիպած է փոխնախագահ Ճէյ Տի Վենսին՝ Թրամփի վարչակազմին կոչ ընելու՝ հակամարտութիւնը աւելի չսրելու՝ Եմէնի հուսիներուն դէմ գրոհներ գործադրելով»,– գրած է գործակալութիւնը՝ յղում կատարելով անունը չյայտնած երկու աղբիւրի։
Աւելի վաղ հուսիները յայտարարած էին, որ ծովային շրջափակում կը սահմանեն Սէուտական Արաբիոյ նկատմամբ՝ ի պատասխան Եմէնի օդային տարածքին եւ անոր նաւահանգիստներուն նկատմամբ Սէուտական Արաբիոյ գործադրած վերահսկողութեան։ Յուլիս 29-ին անոնք յայտարարած էին Կարմիր ծովուն մէջ սէուտական երկու նաւթատար նաւերու դէմ գրոհի մասին։
