19.09c
Երեվան
կրկ, մրտ 30
Հալէպի մէջ Թուրքիոյ հիւպատոսը այցելած է Հայաստանի Հանրապետութեան հիւպատոսարան։
Ասոր մասին «Արեւելք» վերահասու դարձաւ ՀՀ հիւպատոսարանի պաշտօնական էջէն։
Ստորեւ ատոր մասին տրուած հաղորդագրութիւնը։
26 Մարտին Հալէպի մէջ Հայաստանի Հանրապետութեան գլխաւոր հիւպատոսութիւն այցելած է Հալէպի Թուրքիոյ Հանրապետութեան գլխաւոր հիւպատոս Մուամմեր Հաքան Ճենքիզը և փոխհիւպատոս Էրինը: Այս մասին կը յայտնէ ՀՀ Գլխաւոր Հիւպատոսութիւնը։
Ողջունելով հիւրերը ՀՀ գլխաւոր հիւպատոս Արա Աւետիսեան շնորհաւորած է Մուամմեր Հաքան Ճենքիզը՝ նախ երկար դադարէ ետք Թուրքիոյ հիւպատոսութեան վերաբացման, ապա այդ պաշտօնին իր նշանակման եւ Ռամատան ամսուան առիթով:
Արա Աւետիսեան տեղեկացուցած է, որ ՀՀ գլխաւոր հիւպատոսութիւնը Հալէպի մէջ կը գործէ աւելի քան 30 տարիէ ի վեր և իր հիմնադրման օրէն երբեք չէ դադարեցուցած իր գործունէութիւնը՝ նոյնիսկ Հալէպի պաշարման և պատերազմի օրերուն: ՀՀ գլխաւոր հիւպատոսը շնորհակալութիւն յայտնած է վերջերս Հայաստանի Հանրապետութենէն Սուրիա մարդասիրական օգնութեան տեղափոխման հարցով թրքական կողմին աջակցութեան և այդ երկրով օժանդակութեան շարասիւնի անարգել անցման համար:
Շնորհակալութիւն յայտնելով ընդունելութեան համար, Մուամմեր Հաքան Ճենքիզ նշած է, որ, մեկնելով դիւանագիտական բարոյագիտութեան կանոններէն, իր պարտքը համարած է այցելել Հալէպի մէջ գործող միակ դիւանագիտական ներկայացուցչութիւն և ծանօթանալ իր հայ գործընկերոջ:
ՀՀ գլխաւոր հյուպատոսը յաջողութիւն մաղթած է թուրք գործընկերոջ իր դժուար առաքելութեան մէջ: Հանդիպման աւարտին Թուրքիոյ գլխաւոր հիւպատոս Մուամմեր Հաքան Ճենքիզ ջերմ շնորհակալութիւն յայտնած է ընդունելութեան համար եւ Հայաստանի գլխաւոր հիւպատոս Արա Աւետիսեանը հրաւիրած է Թուրքիոյ գլխաւոր հիւպատոսութեան բացման, ինչպէս նաև յարմարութեան պարագային այցելելու Թուրքիոյ Հանրապետութեան հիւպատոսութեան ժամանակաւոր գրասենեակ:
Կողմերը համաձայնած են շարունակել գործակցութիւնը:
