13.09c
Երեվան
ուրբ, հկտ 30
Երուսաղէմի մէջ տղամարդ մը թքած է Հայկական թաղամասին մէջ գտնուող Սրբոց Յակոբեանց վանքի մուտքին եւ վիրաւորած է հայ պահակը, որ դիտողութիւն ըրած է իրեն։ Միջադէպը տեղի ունեցած է Երեքշաբթի երեկոյեան՝ Իսրայէլի խորհրդարանական ընտրութիւններու օրը։
Այս մասին կը հաղորդէ Zartonk Media-ն։
«Չե՞ք ամչնար վանքին վրայ թքելէ», հարցուցած է պահակը տղամարդուն։
Ի պատասխան՝ վերջինս պահակէն պահանջած է լռել եւ հայհոյած է անոր։
Սրբոց Յակոբեանց վանքը Երուսաղէմի Հայոց Պատրիարքութեան նստավայրն է եւ հայոց պատրիարքին կեցավայրը։ Օգոստոսէն ի վեր սա վանքի մուտքին դէմ արձանագրուած երրորդ յարձակման դէպքն է։
Սեպտեմբեր 26-ին տեսահսկման տեսախցիկները նկարահանած են այլ տղամարդ, որ փորձած է միզել վանքին պատին։ Հայ պահակը ստիպած է անոր հեռանալ։ Իսկ Օգոստոս 2-ին վեց իսրայէլացիներ՝ հինգ անչափահաս եւ մէկ չափահաս, թքած են մուտքին, հարուածած են դարպասները եւ քարեր նետած վանքին տարածք։ Քարերը հասած են նաեւ իր տան պատուհանին, երբ հայուհի մը ներսէն կը նկարահանէր պատահածը։ Աղբիւրին համաձայն՝ այդ յարձակման առնչութեամբ տասը անձ ձերբակալուած է։
Երուսաղէմի Հին քաղաքին մէջ քրիստոնեաներու նկատմամբ հալածանքներու ծաւալը կ՚արտացոլուի Կրօնական ազատութեան տուեալներու կեդրոնին (RFDC) այս ամիս հրապարակած զեկոյցին մէջ։ 2026 թուականի Յուլիսէն մինչեւ Սեպտեմբեր կազմակերպութիւնը 96 միջադէպերու ծիրէն ներս արձանագրած է ճնշումներու 106 դրսեւորում։ Հին քաղաքին մէջ արձանագրուած 77 միջադէպերէն 45-ը տեղի ունեցած է Հայոց Պատրիարքութեան փողոցին մէջ՝ Հայկական թաղամասի կեդրոնը։ Արձանագրուած 106 դրսեւորումներէն 77-ը թքելու դէպքեր եղած են։
