image

Բարերար Մայք Սարեանի գլխաւորութեամբ նիւթական աջակցութիւն Լիբանանահայ գաղութին

  Բարերար Մայք Սարեանի գլխաւորութեամբ  նիւթական աջակցութիւն Լիբանանահայ գաղութին

 Օրերս Լիբանանահայ գաղութի կարիքներուն հասնելու նպատակով դրամահաւաքի երեկոյ մը կայացած է Լոս Անճլըսի մէջ։

 

 Այս մասին «Արեւելք» տեղեկութիւն ստացաւ Լոս Անճըլսի իր աղբիւրէն։

 

 Մանրամասնութեանց մէջ կը նշուի, որ երեկոն կայացած է ազգային նուիրեալ բարերար Մայք Սարեանի ճիգերով, իսկ նախաձեռնութիւնը կը պատկանի օրերս հիւրաբար Միացեալ Նահանգներ գտնուող ազգային գործիչ ՝ Տօքթ. Աւետիս Տագէսեանին։

Երեկոյի ընթացքին խօսքով հանդէս եկած է Մայք Սարեանը, որ կարեւորած է լիբանանահայութեան դերը եւ յոյս յայտնած որ գաղութը շնորհիւ հաւաքական ճիգերու պիտի կարողանայ այս օրերուն Լիբանանը հարուածող ծանր տագնապէն դուրս գալ եւ շրջանցել բոլոր տեսակի դժուարութիւնները։ 

Այստեղ տեղին է նշել, որ Մայք Սարեանի կողքին այս երեկոյի կազմակերպման գործին մէջ կարեւոր ներդրում ունեցած են համայնքային գործիչներ իրաւաբան ՝ Յովսէփ Կանիմեանն ու գործարար Գէորգ Հալէպլեանը, որոնք տարբեր առիթներով ալ իրենց նեցուկը բերած են լիբանանահայութեան։

 

Դարձեալ  Arevelk.am ի տեղեկութիւններով հաւաքուած գումարը պիտի տրամադրուի հայկական վարժարաններու ուսուցիչներուն,ինչպէս նաեւ կարիքաւոր ընտանիքներու։

 Ի դէպ Սարեան, Կանիմեան, Տագէսեան եւ Հալէպլեան մանկութեան ընկերներ են եւ անոնց վաղեմի ընկերական անկեղծ կապը կարեւոր դեր ունեցած է սոյն նախաձեռնութեան յաջողութեան։

Աւելի քան որեւէ ժամանակ Լիբանանի հայկական համայնքին նեցուկ կանգնիլը այս օրերուն դարձած է անմասն մէկ  կէտը համահայկական մեծ օրակարգին։

 

 Վարձքը կատար բոլորին։