6.09c
Երեվան
շբթ, մրտ 08
Ուքրանիոյ պատերազմը արմատապէս պիտի փոխէ Պաղ պատերազմէն յետոյ անվտանգութեան ճարտարապետութիւնը եւ շրջադարձային պահ է Եւրոպայի ապագային համար: Այս մասին ըսուած է Մայիս 9-ին՝ Եւրոպայի օրուան կապակցութեամբ Թուրքիոյ արտաքին գործոց նախարար Մեւլութ Չաւուշօղլուի ուղերձին մէջ:
Անոր խօսքով` այսօր Եւրոմիութիւնը սպառնալիքներուն դիմակայելու ստուգումէ կ'անցնի: «Կատարուողի լոյսին տակ մենք կրկին համոզուեցանք, թէ որքան դժուար եւ արժէքաւոր է խաղաղութեան պահպանումը: 21-րդ դարուն Եւրոպայի սրտին մէջ ծաւալած ողբերգութիւնը գործնականին մէջ Եւրոպան կը վերադարձնէ 1940-ականներ, եւ այդ տագնապալի ազդանշան է բոլորիս համար... Բացի պատերազմներէն եւ հակամարտութիւններէն, Եւրոպայի վրայ մեծապէս կ'ազդէ համաշխարհային անորոշութիւնը, կլիմայի փոփոխութիւնը, ուժանիւթային կախուածութիւնը, ահաբեկչութիւնը եւ անօրինական արտագաղթը», ըսած է ան:
Բացի այդ, անոր խօսքով, ԵՄ-ին կը սպառնան «ծայրայեղական հոսանքները, խտրականութիւնը, այլատեացութիւնը եւ իսլամաֆոպիան, ինչ որ համակեցութեան մաշում կ'առաջացնէ եւ կը խարխլէ ընդհանուր արժէքները, որոնց վրայ հիմնուած է Եւրոպան»:
Ան վստահեցուցած է, որ, որպէս ԵՄ-ի անդամութեան թեկնածու եւ ՆԱԹՕ-ի դաշնակից, Թուրքիան «առանցքային երկիր է բոլոր յառաջացող խնդիրներու լուծման հարցով, որոնց կը բախի Եւրոպան»: «Չնայած որոշ շրջանակներ, յատկապէս Եւրոմիութեան մէջ, ժամանակ առ ժամանակ Թուրքիոյ մէջ մրցակից եւ նոյնիսկ սպառնալիք կը տեսնեն, Անկարան զգալի ներդրում ունեցած է եւ ունի ցամաքամասի կայունութեան եւ բարգաւաճման գործին մէջ` բազում զոհողութիւններ ընելով յանուն Եւրոպայի անվտանգութեան, ինչպէս այդ եղած է Պաղ պատերազմի ժամանակաշրջանին», ըսած է Չաւուշօղլուն` նշելով, որ Թուրքիան կը շարունակէ իր կառուցողական ընթացքը Եւրոպայի հետ համագործակցութեան եւ երկխօսութեան համապարփակ զարգացման ուղղութեամբ` Եւրոմիութեան անդամակցելու ռազմավարական նպատակի լոյսին ներքոյ:
