2.09c
Երեվան
հնգ, դկտ 18
Ն.Ս.Օ.Տ.Տ. Արամ Ա. Սրբազնագոյն Կաթողիկոսը, իր պատուիրակութեան անդամներուն ընկերակցութեամբ, այցելեց Կիպրոսի Հանրապետութեան մէջ Հայաստանի Հանրապետութեան նորաբաց դեսպանատունը, ուր դիմաւորուեցաւ նորանշանակ դեսպան Իննա Թորգոմեանի եւ դեսպանատան անձնակազմին կողմէ:
Այս մասին «Արեւելք» կը տեղեկանայ «Կիլիկիա» հարթակէն։
Ստորեւ տրուած հաղորդագրութիւնը՝
Կիրակի, 7 Դեկտեմբեր 2025-ի երեկոյեան, Արամ Ա. Սրբազնագոյն Կաթողիկոսը, իր պատուիրակութեան անդամներուն ընկերակցութեամբ, այցելեց Կիպրոսի Հանրապետութեան մօտ Հայաստանի Հանրապետութեան նորաբաց դեսպանատունը, ուր դիմաւորուեցաւ նորանշանակ դեսպան Իննա Թորգոմեանի եւ դեսպանատան անձնակազմին կողմէ:
Դեսպանը ողջունելով Հայրապետին այցելութիւնը՝ ըսաւ, թէ մեր ժողովուրդին եւ համազգային ու միջ-եկեղեցական մակարդակներու վրայ բարձր վարկ վայելող հեղինակաւոր անձնաւորութիւն է Նորին Սրբութիւնը եւ մեզի համար մեծ պատիւ է ու օրհնութիւն ընդունիլ զինք այս նորաբաց դեսպանատան մէջ:
Արամ Ա. Կաթողիկոս, իր կարգին, ողջունելով Կիպրոսի ու Հայաստանի միջեւ զարգացող դիւանագիտական յարաբերութիւնները՝ շեշտեց երկու երկիրներու միջեւ գործակցութիւնը ամրապնդելու հրամայականը, որովհետեւ մեր ունեցած պատմական կապերն ու հասարակաց արդարութեան դատը պէտք է առաւել եւս մղէ զոյգ երկիրներու պետութիւնները գործակցութեան ու միացեալ մօտեցումներու ճշդման՝ ներկայ աշխարհը յուզող տագնապներու գծով:
Յայտնենք, որ Հայաստանի Հանրապետութեան դեսպանատունը շուրջ երկու ամիս առաջ հաստատուեցաւ Կիպրոսի մայրաքաղաք Նիկոսիոյ մէջ։
