18.09c
Երեվան
կրկ, ապր 05
Հայաստանի Հանրապետութեան վարչապետ Նիկոլ Փաշինեանի խօսքով՝ Ղարաբաղեան շարժումն ընդամէնը լծակ էր Հայաստանի Հանրապետութեան կայացումը թոյլ չտալու համար։
ՀՀ վարչապետ, «Քաղաքացիական պայմանագիր» կուսակցութեան վարչութեան նախագահ Նիկոլ Փաշինեանն այդ մասին յայտարարած է ՔՊ կուսակցութեան 8-րդ արտահերթ համաժողովին։
«Մենք կամք են դրսեւորել՝ չշարունակելու Ղարաբաղեան շարժումը, որովհետեւ մենք, ի վերջոյ, այս ծանր ճանապարհն անցնելով՝ արձանագրել ենք, որ Ղարաբաղեան շարժումն ու մեր պատմութեան շատ էջեր թւում է, թէ նպաստաւոր են մեր ժողովրդի համար, բայց իրականում, ինչպէս մեր պատմագրութիւնն է արձանագրել, դրանք ընդամէնը աշխարհաքաղաքական թակարդներ էին, որոնք, յայտնի է, թէ ինչ ամփոփում եւ աւարտ են ունեցել»,-ըսած է Փաշինեանը։
Անոր պնդմամբ՝ շատ կարեւոր է հոգեբանական եւ ընկերային-քաղաքական առումով չչքմեղանալ եւ ուժ ունենալ պաշտպանելու սեփական որոշումը։
«Բոլոր նրանց, ովքեր պնդում են, որ Ղարաբաղը մերն էր, բայց այլեւս մերը չէ, պէտք է յստակ հակադարձենք, որ իրականութիւնն այլ է։ Հայաստանի Հանրապետութիւնը մերը չէր, բայց այլեւս մերն է, որովհետեւ Ղարաբաղի շարժումն ընդամէնը լծակ էր Հայաստանի Հանրապետութեան կայացումը թոյլ չտալու համար։ Հայաստանում գործող, եւ առնուազն մեր կուսակցութիւնում ակտիւ քաղաքական գործիչների զգալի մասը ծագում է հենց ղարաբաղեան շարժումից, բայց հենց այստեղ է առաջնորդութեան առանձնայատկութիւնը, երբ դու կարողանում ես ինքնահայեցողութեան, ինքնաքննադատութեան պատմական եւ աշխարհաքաղաքական համատեքստերը հասկանալով՝ քո առաջնորդութեանը վստահուած պետութիւնն ու ժողովրդին դուրս բերել աշխարհաքաղաքական թակարդներից։ Մենք Հայաստանը դուրս ենք բերել աշխարհաքաղաքական թակարդից եւ, ինչպէս խոստացել էինք ժողովրդին, Հայաստանը հասցրել ենք խաղաղ հանգրուանի»,- նշած է Փաշինեանը։
