2.09c
Երեվան
ուրբ, փտր 27
Իմ պաշտօնավարումը որպէս Արցախի Հանրապետութեան աշխատանքի, ընկերային եւ գաղթի հարցերու նախարար կը մօտենայ աւարտին: Այս մասին դիմատետրեան իր էջին յայտնած է նախարար Մանէ Թանդիլեանը:
«Ժամանակն անցնում է եւ Արցախի առջեւ ծառացած մարտահրաւէրները մտնում են նոր փուլ: Եթէ վերջին օրերին եղել էք Արցախում, ապա նկատած կը լինէք, որ Արցախում կեանքը վերադարձել է բնականոն հուն՝ առօրեական իմաստով։ Եւ սա արցախցու՝ իր հողում ապրելու որոշման եւ յանձնառութեան ուժի շնորհիւ է՝ էլ աւելի ուժեղ դառնալով սահմռկեցուցիչ ցաւից եւ այս հողի համար կեանք չխնայած հերոսների նկատմամբ պարտքի զգացումից։ Արցախի բնակչութեան շուրջ ութսուն տոկոսը վերադարձել է Արցախ՝ ապրելու։ Սա նշանակում է, որ Արցախը թօթափում է յետպատերազմեան սոցիալ-հոգեբանական բեռը եւ կանգնում զարգացման եւ ուժեղացման ճանապարհին, ինչը հնարաւոր է դարձել աշխատանքի, յանձնառութեան եւ ոչ մի դէպքում չկոտրուելու կամքի շնորհիւ։
Այժմ եկել է երկարաժամկէտ ծրագրերի եւ տնտեսական զարգացման խթանման ժամանակը։
Արձանագրելով, որ սոցիալական հարցերի ամբողջական եւ լիարժէք յաղթահարման բանալին իւրաքանչիւր երկրում զարգացած տնտեսութեան մէջ է, այսօր Արցախի ուժեղացմանը եւ մարդկանց այնտեղ ապրելուն կարող են նպաստել տնտեսութեան զարգացումը՝ բնակարանաշինութեան եւ քաղաքացիներին օր առաջ տներով ապահովելու աշխատանքներին զուգընթաց։
Այսպիսով, թոյլ տուէք տեղեկացնել, որ Արցախի Հանրապետութեան նախագահ Արայիկ Յարութիւնեանի հետ մեր նախնական պայմանաւորուածութեան համաձայն, իմ պաշտօնավարումը որպէս Արցախի Հանրապետութեան Աշխատանքի, սոցիալական եւ միգրացիայի հարցերի նախարար մօտենում է աւարտին։ Սեպտեմբերի 1-ից իմ ծառայութիւնը Արցախին շարունակելու եմ «Ապրելու Արցախ» հիմնադրամի գործունէութեան շրջանակներում, որի միջոցով Արցախում իրականացուելու են բազմաթիւ ծրագրեր, եւ առաջին հերթին, մեր գործընկերների ուղղակի եւ գործուն մասնակցութեամբ, Արցախի Դահրաւ գիւղի մօտ կառուցուում է 100 տուն ունեցող նոր բնակավայր, որտեղ կարող են կեանքը շարունակել տեղահանուած մեր արցախցի հայրենակիցները։
Համոզուած եմ, որ եթէ Արցախի մասին խօսող իւրաքանչիւր ոք գոնէ մէկ անգամ այս ընթացքում գայ Արցախ, մնայ այստեղ, գտնի իր անելիքը, ապա մենք լիովին այլ իրականութիւն կը ստեղծենք շատ կարճ ժամանակամիջոցում։
Շնորհակալ եմ Արցախի Հանրապետութեան Կառավարութեան իմ գործընկերներին, նախարարութեան մեր բոլոր աշխատակիցներին փոխադարձ վստահութեան մթնոլորտում աշխատելու եւ Արցախին ծառայելու ինձ ընձեռնուած հնարաւորութեան համար, որը նորովի կը շարունակեմ յետայսու, քանզի միշտ փնտռելու եմ եւ գտնելու եմ ամենաարդիւնաւէտ միջոցները մեր միասնական հայրենիքին ծառայելու գործում՝ ինչ էլ որ դա նշանակի»,- յայտնած է Թանդիլեանը։
