14.09c
Երեվան
հնգ, ապր 03
Օրերս Բերիոյ Հայոց Թեմի Բարեջան Առաջնորդ Գերշ. Տ. Մակար Սրբ. Արք. Աշգարեան, Բերիոյ Թեմի Կաթողիկէ Հայոց Առաջնորդ Արհի. Տ. Պետրոս Արք. Միրիաթեան եւ Սուրիոյ Հայ Աւետարանական Համայնքի Պետ Վեր. Դոկտ. Յարութիւն Սելիմեան, հանդիպում մը ունեցած են Աւետարանական Եկեղեցւոյ համայնքապետարանէն ներս, ուր կողմերը արծարծած են ներկայիս երկրին մէջ տիրող իրավիճակը եւ յառաջիկայ օրերուն տեղի ունենալիք հայոց ցեղասպանութեան նուիրուած նախաձեռնութիւնները:
Հանդիպման մասին «Արեւելք» իմացաւ Հայ Աւետ. Եկեղեցւոյ դիմատետրեան էջէն։
Երեքշաբթի, 1 Ապրիլ 2025-ի առաւօտուն, Սուրիոյ Հայ Աւետարանական Համայնքի Պետ Վեր. Դոկտ. Յարութիւն Սելիմեան, համայնքապետարանի իր գրասենեակէն ներս հիւրընկալեց հայ համայնքապետեր՝ Բերիոյ Հայոց Թեմի Բարեջան Առաջնորդ Գերշ. Տ. Մակար Սրբ. Արք. Աշգարեան եւ Բերիոյ Թեմի Կաթողիկէ Հայոց Առաջնորդ Արհի. Տ. Պետրոս Արք. Միրիաթեան։
Ջերմ մթնոլորտի մէջ ընթացող հանդիպումին համայնքապետերը հակիրճ կերպով անդրադարձան օրակարգային նիւթերու, արծարծեցին երկրի մէջ տիրող իրավիճակն ու ծառացած մարտահրաւէրները, ինչպէս նաեւ յառաջիկայ օրերուն տեղի ունենալիք Հայոց Ցեղասպանութեան նուիրուած նախաձեռնութիւնները։ Հանդիպումի աւարտին հոգեւոր պետերը բարեմաղթութիւններ փոխանակեցին իրարու եւ աղօթք բարձրացնելով առ Աստուած՝ խաղաղութիւն, սէր, միութիւն եւ համերաշխութիւն մաղթեցին ողջ աշխարհին։
