Իսրայէլ հարուածեց Լաթաքիան

  Իսրայէլ հարուածեց Լաթաքիան

 Մէկ ամսուայ ընթացքին  երկրորդ անգամն Իսրայէլ հարուածեց Լաթաքիոյ նաւահանգիստը։ 

 

 Այս մասին «Արեւելք» տեղեկութիւններ քաղեց «Ալ Մայատին» կայքէն։

 

 Աղբիւրը նաեւ նշեց, որ այսօր արեւծագին  իսրայէլեան բանակի ծովու հատուածէն հարուածներ տուաւ Լաթաքիոյ նաւահանգիստին թիրախաւորելով յատկապէս նաւանագիստի պահեստանոցները, որու հետեւանքով ալ մեծ հրդեհներ ծագեցան։

 Աւելի ուշ Լաթաքիոյ հրշէջ մարմիններ մարեցին առկայ հրդեհները։

 

 Այս պահու տուեալներով եղած հարուածներուն հետեւանքով մարդկային կորուստներ չեն գրանցուած ու նկատելի է նաեւ, որ հարուածները պատճառած են նիւթական մեծ վնասներ։ 

 

 Յիշեցնենք, որ այս ամսուայ սկիզբին եւս Իսրայէլ նման թշնամական արարք իրականացուցած էր եւ ըստ կարգ մը ռազմական վերլուծաբաններու այս կերպ Թէլ Աւիւ նպատակ ունի Սուրիոյ բանակի ռազմական ունակութիւնները հարուածի տակ դնել։

 

 Միւս կողմէ «Սանա» գործակալութիւնը նկատել տուաւ, որ Սուրիոյ բանակի հակօդային համակարգեր պաշտպանական կրակ բացած են եւ թիրախաւորած իսրայէլեան կողմէն նետուած հրթիռները։